Rætt við Hjörleif Guðmundsson trillukarl og þúsundþjalasmið í Ólafsvík

Hjörleif Guðmundsson þekkja flestir sem eiga smábáta í Snæfellsbæ og víðar um land. Hann hefur um margra ára skeið aðstoðað útgerðarmenn sem þurfa að láta laga báta sína svo sem að gera við eða gera upp vélar eða plasta báta, svo dæmi séu tekin. „Ég byrjaði á sjó 16 ára og var þá á Sigurvík SH frá Ólafsvík. Þá fór ég einnig á fraktara í smá tíma og svo á nokkra aðra báta, allt þar til ég keypti minn fyrsta bát um tvítugt. Það var svokallaður Færeyingur því mig langaði að fara í eigin útgerð,“ segir Hjörleifur. „Ég keypti þann bát af Hauki frænda mínum.“ Aðspurður segist Hjörleifur ekki vita um fjölda þeirra báta sem hann hefur átt um ævina. „Nei, ég man það bara ekki segir hann kankvís; „þeir eru nokkrir.“

Byrjaði á sjálfum mér

„Þetta með vélarbrasið byrjaði með því að ég þurfti að redda mér sjálfur þegar eitthvað bilaði í mínum eigin báti. Svo leiddi þetta eitt af öðru og hef ég keypt vélar til þess að gera upp og síðan selja þær til þeirra sem þurftu vélar. Núna er ég að vinna í þessu eftir að strandveiðum lýkur á sumrin; er að skipta um vélar og annað sem þarf að laga í bátunum. Þá er ég ég búinn að ná mér í réttindi til þess að plasta báta. Hef lengi verið í trefjaplast viðgerðum en þurfti að bíða mjög lengi eftir réttindunum. Ég er búinn að koma mér upp ágætu húsnæði til þessara verka, enda meira en nóg að gera að undanförnu,“ segir Hjörleifur. „Ég keypti skel af Sómabát fyrir þremur árum og lengdi hann og gerði bátinn alveg upp frá grunni enda var ekkert í honum. Ég var á annað ár að vinna í honum með hléum; keypti meðal annars nýja vél og allan búnað sem þurfti í bátinn og vann allt sjálfur. Þessi bátur hefur reynst mér mjög vel.“ Að sjálfsögðu fékk báturinn nafnið Geisli SH eins og flest allir bátar Hjörleifs, utan einn sem hét Smyrill.

**Hér er dyttað að handfærarúllu í einum af mörgum bátum sem hann hefur átt.**

Lagar bát bróður síns

Hjörleifur er þessa stundina að skipta um allt rafmagn í bát bróður síns sem er búsettur í Reykjavík. „Ég er að skipa um allt rafmagn og skipta um hurð og búa til nýtt púlt í bátinn. Svo þegar því verki lýkur fer ég í að gera upp Gaflara sem ég keypti á uppboði. Úr þeim báti hef ég tekið gömlu vélina úr og keypti notaða öfluga vél í staðinn. Þá þarf að leggja nýtt rafmagn og annað í þann bát, en ég set sennilega bara vélina í núna og klára rest þegar tími gefst því ég þarf að laga annan bát í millitíðinni þegar ég er búinn með bát bróður míns.“

Hjörleifur sinnir einnig viðhaldi á ísverksmiðju sem er í eigu Fiskmarkaðs Snæfellsbæjar svo óhætt er að segja að það komi aldrei dauð stund hjá hinum ómissandi trillukarli og reddara í Ólafsvík. Auk alls þessa er hann að smíða skyggni á Sómabáta og vélarkassa og blóðgunarkassa í trillur. „Þá tekur ég einnig að sér mér að taka upp báta í uppsátrinu í Ólafsvík og setja þá niður með skotbómulyftara.“ Hjörleifur er að alla daga vikunnar langt fram á kvöld og sjaldan frítími hjá honum.

**Hér er verið að aðstoða Óla á Hallanum.**

Eldur kom upp í bátnum Dritvík SH á Breiðafirði 17. júlí árið 2001. Hjörleifur var beðinn um að fara með slökkviliðsmenn með dælur að bátnum á báti sínum Geisla SH. Á myndinni má sjá Geisla utan á Dritvík og verið að koma dælunum um borð.

„Veit ekki hvað ég hef átt marga báta“

Rætt við Hjörleif Guðmundsson trillukarl og þúsundþjalasmið í Ólafsvík

Rætt við Hjörleif Guðmundsson trillukarl og þúsundþjalasmið í Ólafsvík