Varað við fugladauða og sjónmengun af vindorkuveri á Laxárdalsheiði
Oddviti sveitarstjórnar Dalabyggðar fagnar nýju áliti Skipulagsstofnunar sem segir stórt vindorkuver á Laxárdalsheiði geta haft verulega neikvæð umhverfisáhrif og efast um að réttlætanlegt sé að veita því leyfi
Félagið Qair hefur kynnt áform um að reisa 29 vindmyllur, allt að 200 metra á hæð, á Sólheimum á Laxárdalsheiði.Í nýju áliti Skipulagsstofnunar um umhverfismatsskýrslu Qair fyrir vindaflsvirkjunina sem er 209 MW kemur fram að vindmyllurnar séu af allt annarri stærðargráðu en þekkist í náttúru Íslands. Þær myndu sjást víða að og yrðu sérstaklega áberandi fyrir íbúa í Laxárdal, ferðamenn og laxveiðimenn.
Álitið rímar við áhyggjur sveitarstjórnar
„Ég fagna persónulega þessu áliti Skipulagsstofnunar og það rímar við áhyggjur okkar í sveitarstjórninni af umhverfisþáttum þessara fyrirætlana,“ segir Ingibjörg Þóranna Steinudóttir oddviti sveitastjórnar Dalabyggðar í samtali við Skessuhorn. „Þetta eru alveg svakaleg sjónræn áhrif og arnarvarpið er mjög berskjaldað. Við vöruðum sjálf í sveitarstjórninni við ofmati á jákvæðum samfélagslegum þáttum eins og fjölgun starfa og vanmati á umhverfisþáttum eftir að umhverfismat fyrirtækisins lá fyrir. Það þarf líka að fá lög og ramma um framkvæmdir vegna vindorku í landinu frá stjórnvöldum áður en ráðist í er í undirbúning svona framkvæmda.“
Hafernir sérstaklega berskjaldaðir
Skipulagsstofnun varar við áhrifum á farfugla en mestu máli skipti áhrifin á haferni sem séu sérstaklega berskjaldaðir fyrir áflugi á vindmyllur. Í álitinu segir að áhrifin séu líklega vanmetin í umhverfismatsskýrslu Qair. Fuglar missi búsvæði og gæði þeirra rýrni á stórum hluta alþjóðlega mikilvægs fuglasvæðis. Auk fugladauða og verulegrar sjónmengunar hefur stofnunin einnig áhyggjur af þungaflutningum en leggja þarf marga kílómetra af vegum til að aka túrbínum og efnivið á vettvang. Þá þarf að steypa sökkla og grafa jarðstrengi svo lítið eitt sé talið. Skipulagsstofnun hefur einnig áhyggjur af viðskilnaði við svæðið eftir að notkun lýkur.
Ef leyfi yrði veitt veitt bendir stofnunin á að fyrst þurfi sérstaklega að huga að vöktun á fuglalífi, vatnalífi og endurheimt votlendis. Þá sé mikilvægt að leyfi og rekstur séu tímabundin og gengið verði frá svæðinu þegar notkun lýkur. Æskilegt sé að setja skilyrði um niðurrifstryggingu.
Friðjón Þórðarson sem er talsmaður vindorkuhluta Qair svaraði ekki skilaboðum Skessuhorns um að bregðast við álitinu.
