Bjarki Þorsteinsson sveitarstjóri í Dalabyggð hefur ákveðið að sækjast ekki eftir endurráðningu í starf sveitarstjóra að loknum sveitarstjórnarkosningunum 16. maí næstkomandi. Bjarki segir í samtali við Skessuhorn að ráðningarsamningur hans gildi út maí og muni hann að óbreyttu láta af störfum þá. „Ég hef tilkynnt sveitarstjórn Dalabyggðar um þessa ákvörðun og þótti mér rétt að gera það tímanlega fyrir kosningar þannig að væntanlegir frambjóðendur til sveitarstjórnar viti að hverju þeir ganga í aðdraganda kosninga hvað starf sveitarstjóra varðar.“

Bjarki segir ákvörðun um að gefa ekki kost á mér áfram vera tekna að vel ígrunduðu máli. „Það hefur verið mér bæði heiður og ánægja að gegna starfinu frá því ég tók við því 1. ágúst 2022. Starfið hefur verið fjölbreytt, lærdómsríkt og krefjandi og ég er þakklátur fyrir það traust sem mér hefur verið sýnt af kjörnum fulltrúum, góðu starfsfólki sveitarfélagsins og íbúum. Á starfstíma mínum höfum við í Dalabyggð unnið í góðri sátt að ýmsum mikilvægum verkefnum sem miða að því að efla samfélagið og búa í haginn fyrir framtíðina. Þar má nefna vinnu við eflingu ímyndar og markaðssetningar Dalanna undir slagorðinu; „Við yrkjum lífsgæði í Dölunum,“ sem ætlað er að styðja við jákvæða þróun samfélagsins og miðla styrkleikum þess. Þá hefur verið lögð áhersla á skipulagsmál og undirbúning frekari uppbyggingar, meðal annars með gerð deiliskipulags fyrir aukna íbúðabyggð í Búðardal til að mæta vaxandi áhuga fólks á að flytja í sveitarfélagið. Til viðbótar má nefna ýmiskonar hagsmunagæslu og hagsmunabaráttu m.a. varðandi vegamál, löggæslumál, uppbyggingu atvinnuhúsnæðis og málefna aldraðra svo eitthvað sé nefnt.“

Þá kveðst hann ánægður með jákvæða þróun sem birst hafi í Íbúakönnun landshlutanna sem en í þeirri síðustu var m.a. leitað vísbendinga um upplifun af íbúalýðræði innan sveitarfélaga. Þar skoraði Dalabyggð hæst á landsvísu og heilt yfir var Dalabyggð hástökkvari á milli kannanna og gladdi það okkur mjög.“ Þá rifjar hann upp að nýverið náðist sá mikilvægi áfangi að opna nýja Íþróttamiðstöðin í Búðardal. „Þar er um að ræða stærsta einstaka verkefni sem ráðist hefur verið í af hálfu sveitarfélagsins frá upphafi.

Aðspurður segir Bjarki óljóst hvað taki við í vor. „Ég er opinn fyrir ýmiskonar spennandi áskorunum, líkt og sumarið 2022 þegar mér bauðst starf í Dalabyggð. Ég hef mikinn áhuga á sveitarstjórnarmálum og hef notið þess að starfa innan þess geira nú sem fyrr. Ef spennandi tækifæri gefst á þeim vettvangi mun ég skoða það af alvöru að halda áfram að stússast í sveitarstjórnarmálum og þá á þessum sama grundvelli og síðan árið 2022, en ferli mínum sem kjörnum fulltrúa er lokið.“

Bjarki mun í vor rifa seglin í Dölum