„Við vitum að það er gríðarlegur áhugi, öll gisting á Vesturlandi er uppbókuð, allir bílaleigubílar á landinu upppantaðir og erlendar ferðaskrifstofur eru í stöðugu sambandi,“ segir Margrét Björk Björnsdóttir fagstjóri Áfangastaða og markasstofu Vesturlands og verkefnisstjóri hjá SSV í samtali við Skessuhorn.

Miðvikudaginn 12. ágúst 2026 verður almyrkvi á sólu sjáanlegur frá Íslandi í fyrsta sinn síðan 30. júní 1954. Almyrkvaslóðin liggur yfir Vestfirði, Snæfellsnes, höfuðborgarsvæðið og Reykjanesskaga en búist er við mikilli aðsókn að Vesturlandi þennan dag. Í gær, þriðjudag, var rýnifundur helstu viðbragðsaðila á Vesturlandi. Þar voru á Teams fulltrúar sveitarfélaga á svæðinu, almannavarna, björgunarsveita, heilsugæslu, Vegagerðar, lögreglu og fleiri aðila. Framundan er svo fundur með ferðaþjónustunni.

„Við erum að bregðast við náttúrufyrirbæri sem er fyrirfram vitað að verður mjög stórt. Við vitum ekki alveg hversu margir munu koma, en Vesturland er uppselt nú þegar og auk þeirra gistirýma sem eru í boði verða mörg skemmtiferðaskip á hafsvæðinu þar sem sólmyrkvinn verður sýnilegur. Við þurfum að leita til landeigenda og annarra sem geta mögulega boðið gistingu,“ segir Margrét og bætir við að þetta sé bæði spennandi og ógnvekjandi. „Þetta er heit kartafla sem þarf að grípa og við munum svo sannarlega reyna að gera okkar besta en allir þurfa að vinna heimavinnuna sína og svo þarf að borga brúsann.“

Sólmyrkvinn stendur í um tvær klukkustundir en þar af verður almyrkvi mislangur eftir stöðum og lengstur á Bjargtöngum á Vestfjörðum; tvær mínútur og 13 sekúndur en litlu styttri a Öndverðarnesi á Snæfellsnesi. „Það verða hugsanlega fleiri á ferðinni en innviðirnir bera með góðu móti. Kannski þurfum við að biðla til Reykvíkinga um að skoða sólmyrkvann frekar úr höfuðborginni þótt þeir tapi kannski nokkrum sekúndum fyrir vikið,“ segir Margrét Björk að endingu.

Vesturland er uppselt vegna sólmyrkvans