Ungur bóndi úr Saurbænum segir tekjur sínar á loðnuvertíð fara langt með að dekka áburðarkaup á 600 kinda fjárbúi. Hann verður ásamt hópi fólks að skera og hreinsa loðnu næstu tíu daga

Venus NS-150, uppsjávarveiðiskip Brims, kom til hafnar með 1500 tonn af loðnu til vinnslu á Akranesi í gærmorgun. Þetta er fyrsta loðnan sem berst þangað á vertíðinni. Nú er hrognafylling orðin góð í loðnunni. Hrygnan er skorin á Akranesi en ekið með hrognin til frystingar á Vopnafirði. Hængurinn og afgangurinn af hrygnunni fer til bræðslu á Akranesi. Ákvörðun Brims um að frysta loðnuhrognin á Vopnafirði kostar byggðarlagið um 70 sólarhringsstörf meðan á vertíðinni stendur, eins og komið hefur fram í fréttum Skessuhorns.

Steinþór Logi Arnarsson bóndi í Stórholti í Saurbæ í Dölum og formaður Félags ungra bænda var á fullu að skera loðnu þegar Skessuhorn náði tali af honum í gærmorgun. Hann hefur unnið á loðnuvertíðinni undanfarin ár og segir tekjurnar af loðnuvertíð skipta gríðarlega miklu máli fyrir bændur á svæðinu.

**Ólafur Geir Óskarsson horfir í gær spenntur á fyrstu körin fyllast af hrognum. Ljósm. sla**

Tekjur af loðnu greiða fyrir áburð á túnin

„Þessar tekjur fara langt með að greiða fyrir allan áburð á túnin á búi með 600 fjár,“ segir Steinþór Logi. „Ég var svo heppinn að halda mínu starfi en margir í mínum sporum komust ekki að núna eftir að Brim flutti hrognafrystinguna alfarið til Vopnafjarðar. En vinnslulínan hér er mjög mannaflsfrek og stenst ekki samanburð við þá sem er á Vopnafirði og því er þetta skiljanleg ákvörðun hjá Brimi. En við erum hér á suðvesturhorninu, mjög nærri miðunum, og það skiptir líka miklu máli á þessum verðmætasta hrognatíma. Þetta er mjög góð og fersk vara sem við erum að framleiða. Ég vona að vertíðin verði líka góð á næsta ári og fleiri komi að.“

Steinþór Logi segir alltaf mikla og góða stemningu á loðnuvertíðinni en það eru komin þrjú ár síðan síðast og því mikil eftirvænting. „Hérna er allskonar fólk; bændur, fólk af Akranesi og skólafólk að vinna við skurð og hreinsun. Það eru um 40 sem koma að þessu núna. Árið 2023 voru þetta 120 manns. Það er því mikill munur og margir sem sjá á bak góðum uppgripum. En það verður allavega nægur áburður á mínum túnum.“

**Ekið er með körin með hrognum austur á Vopnafjörð í tæknilega og afkastamikla pökkunar- og frystilínu sem þar er. Ljósm. sla**

Við þiggjum allt gott sem kemur

„Við þiggjum allt gott sem kemur til okkar, líka þótt það mætti vera meira og betra,“ segir Vilhjálmur Birgisson formaður Verkalýðsfélags Akraness í samtali við Skessuhorn. „Það á að landa hérna 10.000 tonnum og það skiptir máli fyrir bræðslufólkið, þótt auðvitað væri betra að Brim væri með öfluga frystigetu og vinnslu á Akranesi,“ segir Vilhjálmur.

**Eftir hreinsun renna hrognin hér í körin. Ljósm. sla**

**Venus NS lagðist að bryggju snemma í gærmorgun með fyrsta loðnufarminn á þessari vertíð. Ljósm. mm**

„Það verður allavega nægur áburður á mínum túnum,“ segir Steinþór Logi Arnarsson bóndi í Stórholti í Saurbæ sem hér tyllir sér á jötubandið í fjárhúsunum. Ljósm. úr safni/mm

Loðnuvertíðin hafin á Akranesi

Ungur bóndi úr Saurbænum segir tekjur sínar á loðnuvertíð fara langt með að dekka áburðarkaup á 600 kinda fjárbúi. Hann verður ásamt hópi fólks að skera og hreinsa loðnu næstu tíu daga

Ungur bóndi úr Saurbænum segir tekjur sínar á loðnuvertíð fara langt með að dekka áburðarkaup á 600 kinda fjárbúi. Hann verður ásamt hópi fólks að skera og hreinsa loðnu næstu tíu daga