Rætt við Trausta Leó Gunnarsson um bílana, fiskinn og tónlistina

Í gömlu fiskvinnsluhúsi í Ólafsvík heyrðist gítarleikur þegar blaðamaður Skessuhorns var þar nýverið á ferð. Þekktir hljómar ACDC fóru ekkert á milli mála. Að sjálfsögðu varð forvitnin öðru yfirsterkari þar sem ekki heyrist nægjanlega oft í þessari ágætu hljómsveit, sem vissulega er í uppáhaldi hjá blaðamanni. Dyrnar á fiskvinnsluhúsinu voru opnar svo það var ekki um annað að ræða en að kíkja inn og sjá hvað væri á seiði. Inni var ungur maður með gítarinn á lofti og í góðu stuði. Þetta er Trausti Leó Gunnarsson. „Ha, ert þú kominn vinur,“ segir Trausti og brosir. Í húsinu er fullt að allskyns tækjum og tólum og tveir bílar sem Trausti hefur viðað að sér. „Já, ég er búinn að vera með bíladellu frá því ég man eftir mér. Mér finnst gaman að gera upp og laga bíla, en ég keypti þetta húsnæði á síðasta ári og hef gert það upp en er að vísu ekki búinn að klára það ennþá, en það kemur smám saman. Þetta bílabrask byrjaði með því að ég keypti notaðan BMW sem ég gerði upp heima í bílskúrnum hjá mér á Hellissandi og tók það mig tíu mánuði,“ segir Trausti.

**Trausti við hliðina á Ford Maverick 71 model. Bíllinn stóð óhreyfður í 40 ár. Við hliðina er grindin af Chevrolet Del Ray.**

Geri allt sjálfur

„Ég geri allt sjálfur og er óþolinmóður ef ég þarf að bíða eftir varahlutum og erfitt að fá varahluti í gamla bíla en ég er með tvo gamla bíla sem ég er að gera upp núna,“ segir Trausti. „Bílarnir eru Chevrolet Del Ray 1958 módelið sem ég er að vinna í núna og er ég búinn taka skelina af grindinni og sandblása hana. Ég er búinn að kaupa 350 cc V8 vél í hann, en ég þarf að smíða alla varahluti því þeir eru ófáanlegir. Svo er ég með Ford Maverick 1971 model sem ég er ekki byrjaður á, en þann bíl keypti ég í Stykkishólmi og hafði hann staðið óhreyfður í 40 ár. Það eru einungis þrír bílar af þeirri tegund til hér á landi,“ segir Trausti og bætir við að hann sé að koma sér upp sprautuklefa til þess að sprauta bílhluti.

**Trausti við hliðina á skelinni af Chevrolet Del Ray árgerð 1958.**

Púsluspil

Auk þessa áhugamáls er Trausti starfsmaður hafna Snæfellsbæjar með aðsetur í Rifi þar sem hann sér um að vigta aflann úr bátunum auk annarra tilfallandi starfa. Þá rekur hann fiskvinnsluna Hafkaup ehf og kaupir fisk af fiskmörkuðum og flakar fiskinn, pakkar og sendir til viðskiptavina sem eru fjölmargir eins og hótel, stofnanir og einstaklingar. „Ég er með einn mann með mér í þessi,“ segir Trausi og bætir við að það sé rólegt í fiskinum á þessum árstíma en á sumrin er mikið meira að gera. „Þá getur verið talsvert púsluspil að ná sólarhringnum saman.“

Tónlistin

Fyrir utan störf sín hefur Trausti mikinn áhuga á tónlist og hefur spilað margoft opinberlega á ýmsum tónlistarviðburðum. „Núna er ég bara sjálfur að glamra á gítarinn því þeir sem ég var með í hljómsveit áður fyrr eru fluttir í burtu og fáir sem hafa tíma og áhuga á að spila. En kannski er það ágætt því ég hef ekki svo mikinn frítíma aflögu núna,“ bætir hann við að endingu.

**Rokk og ról. Trausti kátur með gítarinn sinn.**

Með bíladellu frá barnsaldri

Rætt við Trausta Leó Gunnarsson um bílana, fiskinn og tónlistina

Rætt við Trausta Leó Gunnarsson um bílana, fiskinn og tónlistina