Fram að næstu helgi gera veðurfræðingar ráð fyrir suðvestan átt, víða nokkuð hvassri, samhliða snjókomu eða éljagangi. Lægðardrög fara næstu þrjá daga austur yfir landið. Eftir hádegi í dag verður suðvestan og sunnan 8-15 m/s og snjókoma eða él, en úrkomulaust að kalla á austanverðu landinu. Frost 1 til 7 stig. Skúrir eða él sunnanlands í kvöld og hlýnar heldur.

Í fyrramálið, fimmtudag, verður svo suðaustan 8-15 m/sek og rigning eða slydda, en úrkomulítið á Norðurlandi. Hiti 0 til 6 stig. Gengur í norðvestan 10-18 m/sek með snjókomu á vestanverðu landinu síðdegis á morgun og frystir. Loks á föstudag verður vestan 8-15 m/sek og él eða snjókoma, en léttir til á austanverðu landinu eftir hádegi. Frost 2 til 9 stig. Um helgina verður að mestu þurrt hér á Vesturlandi.

Meðfylgjandi mynd var tekin í Fagradal í gærkvöldi. Þar setti veður strik sitt í ferðaáætlanir nokkurs fjölda þegar hvessti og skyggni versnaði. Nokkurt kóf var á þessum slóðum eins og sést á meðfylgjandi mynd frá Slysavarnafélaginu Landsbjörgu. Björgunarsveitir komu ferðalöngum til aðstoðar.