Fjömörg erindi bárust Umhverfis- skipulags- náttúruverndar- og landbúnaðarnefnd Hvalfjarðarsveitar (USNL) í liðinni viku, en alls tók hún fyrir um tuttugu misjafnlega umfangsmikil mál.

Efnistaka var fyrirferðarmikil á fundinum. Þar var m.a. umsagnabeiðni um aukna efnistöku í landi Litlu – Fellsaxlar þar sem Borgarverk áætlar stækkun fyrirliggjandi námu um tíu hektara. Fyrir er náman um 13 ha að stærð. Einnig var matsáætlun magnesíumframleiðslu á Grundartanga til afgreiðslu, svo og fyrirhuguð efnistaka í landi jarðarinnar Gandheima, þar sem áætlað er að vinna 4,8 milljónir rúmmetra af malarefni á um 52 hektara svæði.

Nefndin tók enn fremur fyrir lýsingu vegna aðalskipulagsbreytingar þar sem lögð er til breyting á umfangi og/eða ákvæðum sjö efnistökusvæða auk skilgreininga nýrra efnislosunarsvæða. Þau eru í landi eftirtalinna jarða: Fellsenda, Kirkjubóls, Kúludalsár, Litlu-Fellsaxlar, Skorholts, Stóru Fellsaxlar og Bakka.

Á jörðinni Fellsenda hyggst landeigandi setja á stofn fornbílasafn auk annarrar þjónustu, svo sem veitinga og fjölbreyttrar afþreyingar á rúmlega 19 ha svæði. Frá því verkefni hefur áður verið sagt frá í Skessuhorni. Landið er skilgreint innan varúðarsvæðis/þynningarsvæðis stóriðjuveranna á Grundartanga. Framkvæmdin kallar á breytingu á aðalskipulaginu þar sem skilgreint er verslunar- og þjónustusvæði.

Einnig fjallaði nefndin um beiðni um deiliskipulagsbreytingu við Katanesveg 30-32 á Grundartanga þar sem Qair á Íslandi ehf undirbýr framleiðslu á rafeldsneyti. Málið hefur áður komið fyrir nefndina í nokkur skipti. Hún taldi að ekki hafi verið unnið fullnægjandi úr athugasemdum sem Skipulagsstofnun hefur gert og fól umhverfis- og skipulagsdeild sveitarfélagsins að afla frekari gagna. Afgreiðslu málsins var frestað. Auk þessa tók nefndin fyrir eina fjóra fundi byggingafulltrúa með hátt á annan tug dagskrárliða.

Annatími hjá USNL nefnd Hvalfjarðarsveitar