Síðari hluti aðalfundar Knattspyrnufélags ÍA var haldinn í gærkvöldi. „Árið 2025 einkenndist áfram af markvissri uppbyggingu á innra starfi félagsins. Rekstur Knattspyrnufélags ÍA er sterkur og fjárhagsstaðan heilbrigð. Rekstrarniðurstaða ársins var jákvæð og nam 54 milljónum króna. Í lok árs 2025 hefur félagið byggt upp sterka lausa- og eiginfjárstöðu sem gerir félaginu kleift að halda áfram að efla innviði og styrkja samkeppnishæfni sína. Fjöldi iðkenda heldur áfram að aukast og jókst þátttaka í yngri flokka starfi félagsins um 15% milli ára, sem endurspeglar öflugt og vaxandi starf,“ segir í tilkynningu frá félaginu.

Á aðalfundinum voru fjórir knattspyrnukappar heiðraðir með gullmerki Knattspyrnufélags ÍA fyrir framlag sitt til félagsins og íslenskrar knattspyrnu. Þetta voru þeir Arnar Gunnlaugsson, Bjarki Gunnlaugsson, Teitur Þórðarson og Pétur Pétursson. Allir hafa þeir borið hróður ÍA víða um land og erlendis um áratugaskeið. Teitur var ekki viðstaddur en hann er búsettur erlendis.

Þá segir: „Knattspyrnufélag ÍA horfir fram á veginn með metnað og kraft þegar félagið gengur inn í árið 2026, 80 ára afmælisár ÍA, með skýra framtíðarsýn, sterkan rekstrargrunn og öflugt samfélag að baki.“

Fjórir voru sæmdir gullmerki KFÍA