Á þorrablóti í Borgarnesi síðastliðinn laugardag var kynnt val á Borgnesingi ársins 2025. Það fór að þessu sinni fram með breyttu sniði. Fyrir þorrablótið, sem Körfuknattleiksdeild Skallagríms heldur, hafði íbúum verið gefinn kostur á að senda inn tilnefningar ásamt rökstuðningi um hver hlyti þessa nafnbót. Tók stjórn körfuknattleiksdeildarinnar þær fyrir á fundi þar sem endanleg ákvörðun var tekin. „Alls voru sjö einstaklingar tilnefndir og ljóst að nýtt fyrirkomulag mæltist afar vel fyrir,“ segir í tilkynningu frá deildinni.

„Ríkharður Harðarson, Borgnesingur ársins 2025, hefur undanfarin ár unnið gríðarlega gott sjálfboðaliðastarf fyrir bæinn okkar og tekið við keflinu í anda Bjössa heitins og sinnt Bjössaróló af alúð og ábyrgð. Hann hefur, í frítíma sínum og af óeigingjörnu hugarfari, séð um viðhald og umhirðu þessarar földu perlu okkar Borgnesinga. Honum er annt um nærumhverfi sitt, er vakandi fyrir úrbótum í bænum og hefur öryggi íbúa ávallt að leiðarljósi.“

Þá segir að Bjössaróló eigi sér merka og einstaka sögu í Borgarnesi og hefur jafnvel verið kallað eitt best geymda leyndarmál bæjarins. „Leikvöllurinn varð til fyrir hugsjón, eldmóð og sköpunarkraft Bjössa, sem nýtti einfaldan og endurnýtanlegan efnivið til að skapa börnum ævintýraheim. Í gegnum tíðina hefur Bjössaróló orðið meira en leiksvæði. Hann stendur sem tákn um frumkvæði, nýtni og áhrif sem einn einstaklingur getur haft á samfélagið sitt. Með þessu viljum við færa Rikka innilegar þakkir fyrir hans framlag. Slíkt sjálfboðastarf fer oft hljóðlega fram og fær ekki alltaf þá athygli sem það á skilið, en það hefur ómetanlegt gildi fyrir samfélagið okkar. Fyrir dugnað, ábyrgð og hlýhug í garð samfélagsins viljum við þakka Rikka kærlega fyrir hans óeigingjarna starf og hlýtur Rikki nafnbótina Borgnesingur ársins.“

**Rikki tekur við verðlaunum og blómvendi frá Sigríði Bjarnadóttur formanni körfuknattleiksdeildarinnar.**

Svipmynd frá Bjössaróló sem Björn heitinn Guðmundsson byggði upp nærri heimili sínu. Bjössi var trésmíðameistara og starfsmaður Kaupfélags Borgfirðinga. Rikki hefur nú gripið boltann og heldur við þessu vel geymda leyndarmáli í Borgarnesi.

Rikki er Borgnesingur ársins 2025