Fundur haldinn í bæjarstjórn unga fólksins á Akranesi

Síðdegis í gær fór fram 24. fundur bæjarstjórnar unga fólksins á Akranesi. Sem fyrr koma þar saman fulltrúar nemenda og félagsmiðstöðva, halda erindi og komu með tillögur um það sem betur má fara í samfélaginu að þeirra mati. Með unga fólkinu á fundinum sat bæjarstjórn eldra fólksins.

„Þarna fengum við „eldri“ bæjarfulltrúar tækifæri á að sjá bæinn okkar í gegnum augu þeirra sem við gleymum stundum að horfa í gegnum; augu þeirra ungu. Augun sem eru óhrædd við að spyrja, benda okkur á það sem betur má fara en á sama tíma sjá tækifærin á milli línanna,“ skrifaði Liv Ása Skarstad bæjarfulltrúi Framsóknar og frjálsra að fundi loknum. Liv segir að unga fólkið hafi á fundinum rætt um félagslífið, skólana, íþróttirnar, hátíðirnar og framtíðina; um rými til að vera þau sjálf, tækifæri til að skapa, læra, blómstra. „Og maður fann svo skýrt að þarna er kynslóð sem vill hafa áhrif og fá að eiga sæti við borðið. Sem lætur sig samfélagið varða – ekki bara eitthvað sem „fullorðnir sjá um.“ Þetta er í hrópandi ósamræmi við þann tón sem hefur verið sleginn úti í samfélagin sl. misseri,“ skrifaði Liv. „Á sama tíma og fjölmiðlar og jafnvel sumir pólitískir fulltrúar hamra á því að börnin okkar séu ólæs, illa gefin og afleiðing einhvers hrörnaðs menntakerfis, þá sit ég þarna og horfi á þau tala af skýrleika, ábyrgð og þroska. Með virkilega ígrundaðar hugmyndir. Og ég hugsa: „Hafa þessir gagnrýnendur nokkurn tíma komið inn í skólana okkar og prófað að tala við krakkana sjálfa,“ spyr bæjarfulltrúinn, og að endingu segir hún: „Við getum verið virkilega stolt af ungmennunum okkar og við eigum að halda þessu áfram, að gefa þeim rými til að tjá sig, til að hlusta, til að spyrja krefjandi spurninga. Og við eigum að treysta þeim.“

Kynslóð sem vill hafa áhrif

Fundur haldinn í bæjarstjórn unga fólksins á Akranesi

Fundur haldinn í bæjarstjórn unga fólksins á Akranesi