Spjallað við Sigurð Kristjánsson fjármálastjóra Borgarbyggðar

Í byrjun árs var tilkynnt að nýr fjármálastjóri væri tekinn við hjá Borgarbyggð. Skessuhorn ákvað að slá á þráðinn til hans og við það rifjuðust upp ýmsar tengingar við Vesturland og reyndar Vestfirði líka. Það er Sigurður Kristjánsson sem hér um ræðir, en hann tók við starfinu 20. janúar síðastliðinn. Hann er fæddur árið 1970 og er Bifrestingur í þeirri merkingu að hann tók rekstrarfræðinám þar og útskrifaðist árið 1994. Síðar bætti hann viðskiptafræðinni við og útskrifaðist með BS próf frá Háskólanum á Bifröst 2001.

Nýtt starf í nýju umhverfi

Sigurður hefur lengst af starfað sem fjármálastjóri Lyfju, en fyrirtækið var keypt af Festi fyrir nokkru og við samrunann voru samlegðar áhrifin nýtt til að leggja niður fjármálasvið Lyfju. Sigurður ákvað eftir þær breytingar að sækja um starf fjármálastjóra Borgarbyggðar. Aðspurður um ástæðuna fyrir áhuga á starfinu sagði hann að starfssvæðið höfði til sín, en bæði hann og kona hans Jórunn Magnúsdóttir eiga að einhverju leyti rætur að rekja á Vesturlandið. Þau eru búsett í Reykjavík svo hann ekur þaðan til vinnu eins og sakir standa. Hann segir að vissulega sé nýja starfið á margan hátt ólíkt fyrri störfum fyrir fyrirtæki eins og Lyfju. En hann er þessar vikurnar að kynna sér fjármálaumhverfi sveitarfélaga og segist hafa til þess góðan kennara sem er Eiríkur Ólafsson fráfarandi fjármálastjóri.

Var mikið í sveit

Borgarbyggð er eins og kunnugt er afar landstórt sveitarfélag með blöndu af dreifbýli og minni þéttbýliskjörnum auk Borgarness sem þjónar stóru svæði sem miðstöð verslunar og þjónustu. Flestir myndu taka undir þá kenningu að viss munur sé á mannlífinu í borg og dreifbýli. Sigurður segist vera svo heppinn að hafa innsýn í hvort tveggja. Hann var ungur í sveit og tilgreinir sérstaklega Vestfirðina, þar sem hann var mikið hjá afa sínum og ömmu. Það voru Sigríður Ólafsdóttir Thoroddsen og Þórður Jónsson móðurforeldrar hans sem hann dvaldi mikið hjá á Hvallátrum í Rauðasandshreppi þar sem stórfjölskyldan á enn gamla húsið þeirra. Móðir Sigurðar er Ragna Gestný Þórðardóttir og faðir Kristján Þorkelsson.

Tengingar víða

Sigurður segist kunna vel við sig í nýja starfinu það sem af er og er ánægður bæði með samstarfsfólk og vinnustað. Hann bjó í Borgarnesi einn vetur þegar hann var í námi á Bifröst og þetta eru því kunnuglegar slóðir að vera á. Hann rekur ættir sínar að einhverju leyti í næsta nágrenni Borgarfjarðar. Lilja Eiðsdóttir amma hans er frá Klungurbrekku á Skógarströnd og afi Þorkell Þorleifsson frá Höfða í Eyja- og Miklaholtshreppi. Jórunn sem er uppalin í Kjósinni á ættir að rekja að Brekku og Desey í Norðurárdal. Svo það eru tengingar víða við svæðið sem nú er undir hjá honum í starfi. Jórunn og Sigurður eiga þrjú uppkomin börn. Ragna Sif er þeirra elst, fædd árið 1990, Karen Rós er fædd 1993 og Magnús árið 2001. Sá síðastnefndi er sá eini sem er enn í foreldrahúsum. Aðspurður segir Sigurður að í tómstundum stundi hann gjarnan hestamennsku og ferðalög, en ekki síst sé að njóta samvista með börnum og barnabörnum.

Gott að starfa í Borgarnesi

Spjallað við Sigurð Kristjánsson fjármálastjóra Borgarbyggðar

Spjallað við Sigurð Kristjánsson fjármálastjóra Borgarbyggðar