Verkefni slökkviliða landsins á síðasta ári voru 2.542 í heildina. Þar eru talin bæði lögbundin verkefni og önnur verkefni sem slökkviliðin taka að sér. Þetta kemur fram í tölfræði úr útkallskýrslugrunni slökkviliða sem Húsnæðis- og mannvirkjastofnun (HMS) hefur unnið fyrir 2025.

Slökkvilið landsins sinna fjölbreyttum og krefjandi verkefnum þegar kemur að slökkvi- og björgunarþjónustu sveitarfélaga. Dæmi um verkefni sem eru lögbundin eru m.a. slökkvistarf og reykköfun, björgun á fastklemmdu fólki t.d. vegna umferðarslysa, eldvarnareftirlit og forvarnir. Flest slökkvilið sinna einnig öðrum verkefnum, t.d. sjúkraflutningum, slökkvitækjaþjónustu og björgunarstörfum. Fjöldi útkalla vegna umferðaslysa á hæsta forgangi voru fleiri á landsbyggðinni á síðasta ári en á höfuðborgarsvæðinu. Útköll vegna umferðaslysa voru 288 sem er fækkun um 18% frá seinasta ári.

Árið 2025 var fjöldi umferðaslysa þar sem slökkvilið voru kölluð á slysstað svipuð á höfuðborgarsvæðinu og á landsbyggðinni. Þó fjöldi tilfella væri svipaður þá voru tilfelli með hæsta forgangi fleiri á landsbyggðinni eða um 32% útkalla á móti 9% útkalla á höfuðborgarsvæðinu. Forgangur útkalla er flokkaður frá F1 til F4. Þar sem F1 og F2 eru tilfelli sem líf telst í hættu og ekið er á forgangsakstri.

Tvö mannslát

Tveir létust á Íslandi í brunum árið 2025. Báðir einstaklingarnir létust í sama brunanum. Um íkveikju í fjölbýlishúsi var að ræða. Eldsútköll hafa ekki verið færri síðan 2020. Útköll þar sem eldur er, eða talið vera, hefur fækkað um 19% miðað við meðaltal síðustu fimm ára þar á undan.

Verkefni slökkviliða árið 2025 voru 2.542 og þar af flokkast 1.012 undir lögbundin hlutverk slökkviliða. Það eru um 40% af þeim verkefnum sem slökkviliðin sinntu. Eldvarnaeftirlit er ekki hluti af viðbragðs verkefnum slökkviliða og eru þar að leiðir ekki inn í þessum tölum. Önnur verkefni slökkviliða fela í sér m.a. viðbrögð við vatnstjónum, óveður, hreinsun, aðstoð við störf annarra viðbragðsaðila og fleira. „Ef horft er til meðaltals síðustu fimm ára má sjá að það er fækkun í verkefnum er falla undir lögbundin hlutverk um 17%. Aftur á móti er aukning í öðrum verkefnum og hafa þau verið að aukast síðustu ár,“ segir í skýrslu HMS.

Forgangsakstur slökkviliða algengari á landsbyggðinni