Um miðjan dag varð óhapp við brúarsporðinn á gömlu Hvítárbrúnni við Ferjukot í Borgarfirði. Mikil hálka er á Hvítárvallavegi. Ökumaður jeppa var að koma frá Hvanneyri en skautaði framhjá brúarendanum, niður af háu barðinu og endaði um einum metra frá árbakkanum. Ökumann sakaði ekki, en var að vonum skelfdur á eftir. Þakkaði að hafa einungis verið á um 40 kílómetra hraða og því náð að stoppa bílinn. Veður er kalt og íshröngl á ánni þannig að ekki hefði þurft að spyrja að leikslokum ef bíllinn hefði farið út í. Tveir vegfarendur um Hvítárvallaveg sendu Skessuhorni meðfylgjandi myndir og er þeim þakkað fyrir.