Miklar breytingar til hins betra urðu í haust á íþróttaaðstöðu við Jaðarsbakka á Akranesi. Opnað var nýtt íþróttahús, AvAir höllin, með stórum sal og fjölbreyttri íþrótta- og æfingaaðstöðu og rúmgóðum áhorfendapöllum. Á sama tíma var líkamsræktarstöð World Class opnuð í gamla íþróttahúsinu eftir gagngerar endurbætur á húsnæðinu. Viðtökur almennings við aukinni þjónustu hafa verið góðar og jafnvel umfram væntingar. Það staðfestir fólkið sem stendur vaktina í vaktrýminu við sundlaugina í samtali við blaðamann. Þar fer fólk um bæði í sund og þreksalinn, en auk þess fylgist starfsfólkið í „búrinu“ með fjölmörgum eftirlitsmyndavélum á þeim svæðum þar sem fólk er við æfingar, svo sem í þreksal nýja íþróttahússins og víðar.

„Frá því í haust hefur fimmfaldast sá fjöldi gesta sem sækir íþróttamannvirkin. Sundið kannski stendur í stað yfir vetrartímann en eykst svo í sumar. Mest munar um World Class en í ræktina hjá þeim mæta á milli sex og sjö hundruð manns á hverjum degi. Á góðum laugardegi eru um 150 manns í einu að taka á því í sal World Class,“ segir Jóhann Pétur Hilmarsson þegar blaðamaður leit við í búrinu í anddyri íþróttahússins sl. fimmtudagsmorgun. Á skjá fylgdist hann og Ingibjörg Svava Magnúsardóttir með fjölmörgum eftirlitsmyndavélum sem sýna beint úr hinum ýmsu rýmum úti og inni. Jóhann Pétur segir að á næstu dögum verði eftir endurbætur opnað í svokölluð heit rými á efri hæð íþróttahússins, þar sem þreksalurinn var áður. Þar verður boðið upp á æfingar undir leiðsögn þjálfara, m.a. pílates, jóga, tabata og aðrar þrekgreinar. Mikil eftirspurn reyndist eftir að fá að þjálfa í heita salnum og segir Jóhann Pétur til marks um það hafi 14 sótt um að þjálfa þegar þar verður opnað.

Umferð í íþróttamannvirkin hefur fimmfaldast