Björtubrauð er gómsæt nýsköpun í atvinnuflóru Snæfellinga

Athafnakonan Guðný Heiðbjört Jakobsdóttir býr í Syðri-Knarrartungu í Breiðuvík ásamt manni sínum Guðjóni Jóhannessyni. Hún hefur nú stofnað bakaríið Björtubrauð og sérhæfir sig í að baka úr súrdeigi. „Það er ekki nema ár síðan að hugmyndin kviknaði,“ segir Guðný í samtali við Skessuhorn. „Ég hafði verið að horfa á myndband þar sem kona gerði súr og bakaði úr súrdeigi og fór að velta fyrir mér hvort þetta væri kannski eitthvað sem ég ætti að prufa.“ Í framhaldinu gerði hún sinn eigin súr og varð í raun hugfangin af þessu viðfangsefni. „Það opnaðist alveg heill heimur fyrir mér,“ segir hún. „Ég bakaði og bakaði og fóðraði fjölskylduna með afurðunum. Þau létu vel af og fyrr en varði var ég farin að miðla þessu til vina og nágranna líka við góðar undirtektir sem var mér mikil hvatning.“

Gefandi samstarf á heimaslóðum

Í framhaldi fór Guðný að velta fyrir sér hvort hún gæti gert eitthvað meira með þetta og stofna fyrirtæki. En þá var spurningin hvar væri hægt að framleiða vöruna því það verður að gerast í viðurkenndu eldhúsi. Úr varð að hún hafði samband við góða grannkonu sína, Ann Thorsson á Litla- Kambi. Þar hafði gömlu hlöðunni verið breytt í veitingaaðstöðu, fyrir nokkrum árum, þar sem fyrirhugað er að verði gallerí og kaffihús og því er á staðnum gott viðurkennt eldhús. Ann tók erindinu afar vel enda féll hugmyndin vel saman við fyrirætlanir hennar og Guðný mun baka nýtt og ferskt brauð og meðlæti með kaffinu á kaffihúsinu sem mun bera nafnið Sveitakaffi Gráborg eftir örnefni á svæðinu.

Björtubrauð og karlakór

Sjálf er Guðný nú komin með öll tilskilin leyfi fyrir nýja fyrirtækið sitt Björtubrauð. Aðspurð um nafn þess viðurkennir hún að þar sé tenging við millinafnið hennar; Heiðbjört. „En svo grínast ég stundum með það að Guðjón kalli mig stundum Björtu sína, en það á helst við einmitt þegar honum finnst ég einmitt vera full svartsýn,“ segir hún og hlær. Blaðamanni er reyndar kunnugt um enn aðra tengingu við Heiðbjartarnafnið því Karlakórinn Heiðbjört starfar á sunnanverðu Snæfellsnesi. Það er ekki slæmt að heill karlakór noti nafnið hennar. Kórfélagar koma saman einu sinni í viku yfir vetrarmánuðina og syngja sér til sálubótar.

Stollen sló í gegn

Reksturinn það sem af er hefur gengið mjög vel, að sögn Guðnýjar, enda er bara eitt annað bakarí starfandi á Snæfellsnesi en það er í Stykkishólmi. Guðný undirbýr baksturinn á fimmtudögum en bakar svo á föstudagsmorgnum og keyrir brauðin sjálf út til áskrifenda eftir hádegið. Þeir hafa fram að þessu aðallega verið á sunnanverðu Snæfellsnesi, en núna er hún einnig komin með afhendingarstað í Ólafsvík, hjá Sóley – saumar, og hyggst einnig senda þangað. „Svo gerðist það eiginlega óvænt að desember varð stór mánuður hjá mér,“ segir hún. „Ég bakaði stollenbrauð úr súrdeigi, en það hefð fyrir því að slík brauð séu bökuð í tilefni jóla í Þýskalandi. Þetta varð svo vinsælt að ég hafði varla við að baka og var að allan mánuðinn,“ segir Guðný og lýkur samtalinu með því að segja að það sé dásamlegt fólk í nærsamfélaginu.

Það er ljóst að gestir og gangandi geta hlakkað til að koma í Breiðuvíkina og fá sér ferskt súrdeigs bakkelsi sem bakað er á staðnum.

**Stollen brauð Guðnýjar vakti mikla lukku á hátíðarborðum um jólin.**

Nýtt sveitabakarí á Snæfellsnesi

Björtubrauð er gómsæt nýsköpun í atvinnuflóru Snæfellinga

Björtubrauð er gómsæt nýsköpun í atvinnuflóru Snæfellinga