Þrír af sjö aðalfulltrúum í sveitarstjórn Hvalfjarðarsveitar hafa tekið þá ákvörðun að gefa ekki kost á sér til endurkjörs við kosningarnar 16. maí í vor. Þetta eru þau Andrea Ýr Arnarsdóttir oddviti, Helgi Pétur Ottesen ritari sveitarstjórnar og Birkir Snær Guðlaugsson sveitarstjórnarfulltrúi. Þau tóku öll sæti í sveitarstjórn eftir kosningarnar fyrir fjórum árum, en þá var viðhaft persónukjör í Hvalfjarðarsveit. Samkvæmt kosningalögum er hverjum þeim sem setið hefur í sveitarstjórn heimilt að skorast undan endurkjöri jafn lengi og viðkomandi hefur setið í sveitarstjórn. Ekki liggur fyrir hvort persónukjör verði aftur í vor, en komi fram einn listi eða fleiri er skylt að viðhafa listakosningar. Því má við þetta bæta að einn aðalfulltrúi í sveitarstjórn lést fyrr á þessu ári, Ómar Örn Kristófersson, en hann varð bráðkvaddur á heimili sínu 17. janúar síðastliðinn.

„Eftir vandlega umhugsun hef ég ákveðið að láta staðar numið í sveitarstjórnarmálum við lok þessa kjörtímabils og sækist ég ekki eftir endurnýjuðu umboði til setu í sveitarstjórn Hvalfjarðarsveitar við næstu sveitarstjórnarkosningar,“ segir Andrea Ýr í samtali við Skessuhorn. „Þetta er ekki léttvæg ákvörðun, en ég tel að fyrir mig og mína sé þetta farsælasta lendingin á þessum tímapunkti. Það er þó aldrei að vita hvað framtíðin ber í skauti sér og hvort leiðir liggja síðar á braut stjórnmálanna. Mig langar að nýta þetta tækifæri og þakka innilega fyrir traustið sem mér hefur verið sýnt síðustu fjögur árin. Ég vil einnig færa öllum þeim sem hafa lagt sitt af mörkum til sveitarstjórnarstarfsins einlæga virðingu og þakklæti. Jafnframt vil ég minnast með hlýju Ómars Arnar Kristóferssonar, sveitarstjórnarfulltrúa,“ segir Andrea Ýr.

Sækjast ekki eftir endurkjöri í sveitarstjórn í vor