Í gær lék lið 9. flokks karla hjá ÍA til úrslita í VÍS-bikarkeppni í körfuknattleik gegn Fjölni í Reykjavík. Leikurinn markaði tímamót í sögu félagsins, en 30 ár eru liðin frá því ÍA lék síðast til úrslita í bikarkeppni í körfuknattleik. Þá er þetta jafnframt í fyrsta skipti sem unglingalið félagsins nær svo langt í keppninni. Þrátt fyrir mikla og góða baráttu varð ÍA að sætta sig við tap, 66–78, í vel spiluðum og drengilegum leik.

Framganga ÍA í keppninni vakti verðskuldaða athygli, enda lagði liðið meðal annars Íslandsmeistara síðustu tveggja ára að velli á leið sinni í úrslitaleikinn. Kjarni liðsins er skipaður fimm leikmönnum úr 9. flokki og til að breikka hópinn fengu þeir til liðs við sig leikmenn úr 7. og 8. flokki.