Rætt við Jóhann Eiríksson bifvélavirkja hjá JE bílverki í Ólafsvík

Jóhann Eiríksson rekur bifreiðaverkstæðið JE bílverk við Dalbraut í Ólafsvík. Afi hans Gautur Hansson hafði í nokkur ár áður rekið bifreiðaverkstæði undir nafninu G.Hansen. Lét Gautur af starfi fyrir nokkrum árum og keypti Jóhann þá verkstæðið af afa sínum og breytti nafninu. Gautur hélt samt sem áður áfram að vinna með barnabarni sínu í nokkur ár og er honum enn til halds og trausts ef svo ber undir.

Fór í nám til Akureyrar

„Ég hafði alltaf mikinn áhuga á að skrúfa og taka allt í sundur á mínum yngri árum og svo var afi náttúrlega alltaf að brasa við og gera við bíla ásamt því að stunda sjóinn. Það lá því eiginlega beinast við að ég færi líka í þetta starf,“ segir Jóhann og bætir við að hann hafi svo farið í nám í Verkmenntaskólanum á Akureyri. Hann ætlaði svo að fara í Borgarholtsskóla. „Ég hætti við það vegna þess að það hentaði ekki náminu sem ég var byrjaður í fyrir norðan. Ég var nánast hálfnaður með námið á Akureyri svo ég fór ég aftur þangað. Fyrir norðan unnum við talsvert á verkstæði úti í bæ sem var í eigu skólans; vorum jöfnum höndum í bóklegu námi og viðgerðum.“

Jóhann segir að bifvélavirkjun sé krefjandi nám og allt bóklegt nám fari fram á ensku. Í því er farið yfir allt tæknilegt um bíla og ansi mikið lesefni sem fylgir því. „Ég fór svo á samning á Bifreiðaverkstæði Reykjavíkur og kláraði sveinsprófið þar á einu ári. Svo byrjaði ég í meistaranáminu sem ég hætti svo í, en er að hugsa um að fara að byrja aftur í því.“

Þá var hægt að fá íhluti

Talsverður munur er á vinnunni sem bifvélavirki í dag í samanburði fyrir nokkrum árum. „Þegar ég byrjaði að vinna hjá afa var þetta öðruvísi vegna þess að þá varstu kannski með startara. Þá gerði maður við þá og hægt var að fá varahluti í allskonar tæki. Maður skipti sjaldan um startara í heilu lagi þar sem það var of kostnaðarsamt. Þá var líka hægt að fá íhluti og laga þá fyrir mikið minni pening en hægt er nú. Í dag er tímakaupið hjá bifvélavirkja orðið talsvert hærra en þegar ég var að byrja og auk þess í mörgum tilfellum ekki hægt að fá íhlutina og oft ódýrari að panta einfaldlega stykkið í heilu lagi en að gera við það gamla. Það var gott að fá að kynnast því að gera við hlutina því í dag er erfitt fyrir þá sem eru að byrja í faginu því þeir þekkja ekki þessar viðgerðir sem áður voru framkvæmdar á verkstæðunum.“

Byggði upp viðgerðahlutann

„Á meðan ég var að vinna hjá afa byggði ég rólega upp viðgerðahlutann. Mér fannst það alveg ómögulegt að þessi þjónusta væri ekki hér til staðar og ég kom með þekkingu úr náminu og með reynslu úr Reykjavík. Ég reyndi að vera duglegur að fara suður viku og viku í senn á verkstæðum þar til þess að kynnast nýjungum og fór ég strax að byggja upp og gera meira en við vorum að gera hér áður.“

Erfitt að fá menn í vinnu

„Eftir að afi dró sig í hlé fór ég að ráða menn í vinnu, en það er erfitt að fá lærða menn til starfa og er það aðallega húsnæðisskorti um að kenna því menn vilja kannski ekki kaupa fasteign hér meðan þeir eru að kynnast bænum.“ Jóhann segir að nú sé hann með tvo góða menn í vinnu og svo kemur afi hans inn á annatímum. „Nú er dæmið farið að ganga upp því við erum þrír og jafnvel fjórir því það er aukin eftirspurn eftir þjónustu. Við erum auk almennra viðgerða að bjóða upp á allt sem tengist dekkjum og smurþjónustu. Auk þess tökum við að okkur rúðuskipti og erum að byrja í rúðuviðgerðum.

Mig langar til að auka þjónustuna hér á þessu svæði og Snæfellsnesi öllu því það er svo mikil fjölgun í bílaflotanum og leiðinlegt að þurfa að senda viðskiptavini alla leið suður því það er kostnaðarsamt. Eftirspurn eftir nýjungum er alveg til staðar og auk þess eru margir ferðamenn sem koma hér yfir sumartímann með allskonar viðgerðir. Það þarf því að þjónusta þá eins vel og hægt er svo þeir geti notið náttúrunnar hér á Snæfellnesi eins og kostur er, í stað þess að þeir þurfi að vera stopp með bilaðan bíl,“ segir Jóhann og ljóst að þar fer maður með mikið jafnaðargeð og ríka þjónustulund.

**Þegar ekki er verið að breyta eða bæta er tíminn notaður til að þrífa dekkjavélina.**

Stækkar um helming

Síðustu vikur hefur Jóhann unnið að stækkun verkstæðisins en hann átti húsnæðið fyrir. Voru iðnarmenn ásamt starfsmönnum verkstæðisins að vinna við stækkunina þegar tími gafst til ásamt föður Jóhanns sem er múrarameistari. Voru þeir að flísaleggja og gera nýjan inngang og opna á milli rýma. Verið er að setja upp eitt stórt viðgerðasvæði og koma fyrir tækjum og tólum. Alls verða fjórar bílalyftur til taks. Jóhann segir að þessi stækkun sé gerð til að ráða betur við að sinna eftirspurninni. „Stækkunin er kærkomin og með því að bæta við manni verða allir með sína lyftu og gott vinnupláss.“

Bætum enn við

„Við eru ekki hættir að breyta og bæta. Við ætlum að halda áfram að bæta aðstöðuna og þjónustuna,“ segir Jóhann glaður í bragði. Aðspurður um hvort þetta starf sé alltaf skemmtilegt svarar hann að það komi erfiðir tíma í þessu eins og öðru, en það sé alltaf jafn gaman að leysa málin. „Munurinn núna eftir stækkun á verkstæðinu er gríðar mikill; meira rými og hver starfsmaður er með sitt vinnusvæði sem hefur mikið að segja.“

Áhugamálin

„Mitt áhugamál er líkamsrækt,“ segir Jóhann. „Það er mikilvægt að núlla hausinn eftir erfiðan dag í vinnunni. Þá hef ég einnig verið að spila blak. Var með KA á Akureyri og á nokkra landsleiki með unglinga landsliðinu að baki. Blakið var aðalástæðan fyrir að ég fór í skólann á Akureyri, en ég hafði áður æft og spilað blak hér í Ólafsvík. Auk þess æfði ég þá göfugu íþrótt júdó fyrir norðan í eitt ár og var það hrikalega gaman. Júdó er skemmtileg íþrótt eins og allir vita sem hafa stundað hana,“ segir Jóhann og bætir við að nú þjálfi hann einnig crossfit. „Það er oft erfitt að finna tíma vegna mikilla verkefna og bitnar það stundum á fjölskyldunni.“ Jóhann er giftur Þorbjörgu Erlu Halldórsdóttir lögreglumanni og eiga þau þrjú börn.

**Húsnæði JE bílverks sem áður fyrr var sláturshús.**

Ungur maður á uppleið í bílaviðgerðum

Rætt við Jóhann Eiríksson bifvélavirkja hjá JE bílverki í Ólafsvík

Rætt við Jóhann Eiríksson bifvélavirkja hjá JE bílverki í Ólafsvík