Fimmtudaginn 29. janúar var eigendum fasteigna og rekstraraðilum í Brákarey í Borgarnesi boðið til upplýsingafundar um málefni eyjarinnar. Efni hans var að kynna þá vinnu sem nú stendur yfir um enduruppbyggingu Brákareyjar, eins og sagði í fundarboði. PwC mun annast áframhaldandi samskipti og samningagerð við hagsmunaaðila fyrir hönd Borgarbyggðar.

Að sögn Stefáns Brodda sveitarstjóra voru fulltrúar vel flestra fasteignaeigenda í eyjunni á fundinum auk fulltrúa Borgarbyggðar og PwC (PricewaterhouseCoopers) sem sveitarfélagið hefur ráðið til ráðgjafar við næstu skref. Helsta verkefni fram undan sé að ná samkomulagi við fjárfesta og eigendur fasteigna. Unnið er að deiliskipulagi á grundvelli rammaskipulags sem fasteignaþróunarfélagið Festir vann í samstarfi við sveitarfélagið á grundvelli samkomulags frá árinu 2022. Sveitarstjórn hafi lagt áherslu á að í eyjunni verði áfram gott aðgengi fyrir íbúa, enda eigi verkefnið að hafa samfélagslegt gildi. Það verði eftirsótt að heimsækja og dvelja í Brákarey og þar verði góð blanda af ferðaþjónustu, atvinnurekstri og íbúðum sem skapar virði fyrir allt samfélagið í sveitarfélaginu. Stefán Broddi segir að nú muni sveitarstjórn fylgja málinu eftir sem fyrr og að þverpólitísk samstaða ríki um það. Vonast hann til að svo verði einnig að loknum sveitarstjórnarkosningum í vor.

Vantar enn svör

Fundargestir spurðu margs. Nokkrir eigenda fasteigna hafa fengið úthlutaðri lóð fyrir starfsemi sína við Vallarás, í iðnaðarhverfi efst í bænum. En tímalína mögulegra flutninga liggur ekki fyrir né heldur fjárhagslegar forsendur við uppkaup fasteigna.

Nokkrir eigendur fasteigna í Brákarey hafa haft samband við Skessuhorn og er það mat þeirra að ekki hafi fengist nægilega skýr svör á fundinum. Flestir þeirra eru með fyrirtæki í rekstri og því sé nauðsynlegt að fá að vita sem fyrst hvenær samið verði við þá og hvernig, langur tími er liðinn síðan hugmyndir um uppbyggingu í eyjunni komu fram og óvissan hefur verið og er mikil.

**Tímalína sem PWC kynnti á fundinum, fjögur skref verkefnisins fram undan skilgreind.**

Kynntu stöðu mála í Brákarey