Aðfararnótt 7. júlí 2018 féll gríðarlega stórt berghlaup úr Fagraskógarfjalli í Hítardal. Talið er að skriðan sé stærsta eða næststærsta jarðfall sem fallið hefur hér á landi frá landnámi og að milli 10 og 20 milljónir rúmmetra hafi fallið fram. Berghlaupið fór yfir Hítará, stíflaði ána og hljóp hálfan annan kílómetra fram. Myndin er tekin skömmu eftir að berghlaupið féll og sést hvernig árvatn Hítarár safnaðist upp í lón ofan við stífluna og leitaði svo nýs farvegs framhjá stíflunni.

Skýr réttur landeigenda að færa Hítará í fornan farveg

Jónatan Hróbjartsson lögmaður hefur skilað tveimur landeigendum í Hítardal og byggðarráði Borgarbyggðar minnisblaði um rétt landeigenda til að fella vatnsfall Hítarár í fornan farveg samkvæmt gildandi lögum. Forsaga málsins er sú að 7. júlí 2018 féll umfangsmikil skriða úr Fagraskógarfjalli vestan Hítarár sem breytti farvegi árinnar á rúmlega eins kílómetra kafla ofan við Kattafoss. Afleiðingarnar urðu þær að vatnafar árinnar breyttist verulega, þannig að nú er um tíu kílómetra kafli árinnar neðan skriðunnar nærri því þurr. Glataðist við það aðgengi göngufisks að 21,4 kílómetra kafla Hítarár, frá Tálma að Hítarvatni. Hafa landeigendur Hítarár, sem urðu fyrir tjóni sökum skriðufallsins, íhugað þann möguleika að færa ána í fyrri farveg þrátt fyrir þann tíma sem liðið hefur frá skriðufallinu. Hafði Veiðifélag Hítarár það verkefni um tíma að sækja um framkvæmdaleyfi til verksins en um síðir kom í ljós að ekki var lengur meirihluti innan veiðifélagsins um að ganga í verkið.