Stjörnuleikar verkefnisins „Allir með“ verða haldnir í íþróttahúsinu á Vesturgötu í samstarfi við ÍA næstkomandi sunnudag, klukkan 11:00–13:00. Viðburðurinn er ætlaður börnum og ungmennum allt að 18 ára aldri sem hafa sérþarfir, sem og þeim sem ekki hafa fundið sig innan hefðbundins íþróttastarfs. „Lögð er áhersla á jákvætt, öruggt og styðjandi umhverfi þar sem allir fá tækifæri til þátttöku á sínum forsendum,“ segir í tilkynningu.

Á dagskrá Stjörnuleika verða fjölbreyttar íþróttagreinar og leikir sem stuðla að hreyfigleði, félagslegri þátttöku og jákvæðri upplifun. „Markmiðið er að skapa notalega og skemmtilega stund þar sem þátttakendur fá tækifæri til að prófa sig áfram í öruggu og styðjandi umhverfi. Foreldrar og aðstandendur eru hvattir til að styðja börnin til þátttöku, og vinir og systkini eru jafnframt hjartanlega velkomin að koma og vera með. Kaffi, djús og með’í í boði og þátttökuverðlaun fyrir iðkendur.“