Allir fangar eiga rétt á því að taka út refsingu sína í opnum fangelsum og geta óskað eftir því. Þetta kemur fram í svari Þorbjargar Sigríðar Gunnlaugsdóttur dómsmálaráðherra á Alþingi við fyrirspurn Nönnu Margrétar Gunnlaugsdóttur þingmanns Miðflokksins. Nanna Margrét óskaði svara við því haða reglur gildi um möguleika þeirra fanga sem fengið hafa þyngstu dómana til að afplána eftirstöðvar refsingar á Kvíabryggju. Jafnframt hvort það fari alfarið eftir hegðun eða hvort ákveðið hlutfall refsingar þurfi að vera lokið áður en flutningur komi til greina.
Í svari ráðherra kemur fram að fangelsi skiptist í opin og lokuð fangelsi. Hér á landi eru rekin fjölgur fangelsi, tvö lokuð og tvö opin og er Kvíabryggja annað þeirra. Eins og áður sagði eiga allir fangar rétt á því að taka út refsingu í opnum fangelsum. Þá segir í svarinu að vistun í opnu fangelsi sé liður í svokallari stigskiptri afplánun og sé markmiðið að auðvelda aðlögun að samfélaginu á ný. Ef fangi uppfyllir skilyrði getur hann farið úr lokuðu fangelsi í opið, þaðan á áfangaheimili og að lokum út í samfélagið með ökklaband þar til afplánun lýkur með veitingu reynslulausnar.
Þá segir í svari ráðherra að vistun í opnu fangelsi sé alltaf ákveðið hlutfall af heildarafplánunartíma hvers og eins og er almennt miðað við að vistun í opnu fangelsi sé ekki lengri en fjögur ár fyrir þá sem hlotið hafa allra lengstu dóma. Sú krafa er gerð að fangi hafi ekki framið agabrot í fangelsi í að minnsta kosti þrjá mánuði fyrir flutning í opið fangelsi. Að öðru leyti er horft til hegðunar og metið hvort viðkomandi sé fær um að afplána dóm þar sem minni gæsla er og aukin réttindi, svo sem aukið netaðgengi. Jafnframt er horft til virkni þeirra í afplánun það er hvort viðkomandi hafi sótt vinnu eða verið í námi.

Allir fangar eiga rétt á opnu fangelsi