Úrskurðarnefnd umhverfis- og auðlindamála hefur hafnað kröfu um frestun ákvörðunar Akraneskaupstaðar um að banna íbúa í sveitarfélaginu að halda hunda á heimili sínu. Íbúanum hafði verið gert að fjarlægja hunda af heimili innan eins mánaðar.

Forsaga málsins er sú að 8. ágúst í fyrra sluppu fjórir hundar í eigu kæranda út af heimili hans og réðust að vegfaranda sem var á göngu með hundi með þeim afleiðingum að vegfarandinn var bitinn í höndina. Með bréfi 25. ágúst var eigandanum tilkynnt að rannsókn væri hafin á þessu atviki. Kom einnig fram í bréfinu að hvorki væri fyrir hendi leyfi til hundahalds umræddra hunda né leyfi til að halda fjóra funda á heimilinu. Þá var þess einnig krafist í bréfinu að hundarnir fjórir færu í skapgerðarmat og komið gæti til þess að eiganda hundanna yrði bannað að halda hunda. Eigandi hundanna gerði athugasemdir við þessar fyrirtætlanir.

Með bréfi 1. desember sl. var hundaeigandanum gerð grein fyrir niðurstöðu skapgerðarmats á hundunum fjórum. Var því slegið föstu um leið að kærandi hefði gerst sekur um alvarleg brot gegn ákvæðum samþykktar hundahalds á Akranesi og var honum í þessu bréfi bannað að halda hunda á heimili sínu og honum gert að fjarlægja hundana af heimilinu innan eins mánaðar.

Í kæru sinni til úrskurðarnefndarinnar vísaði hundaeigandinn til þess að áðurnefnd ákvörðun væri afar íþyngjandi og taldi líklegt að hún yrði felld úr gildi vegna verulegra annmarka á málsmeðferð. Af hálfu Akraneskaupstaðar var vísað til atvika málsins í heild og þá einkum að kærandi hafi haldið fjóra hunda á heimili sínu án leyfis. Það hafi verið mat sveitarfélagsins að áminning og tækifæri til úrbóta yrði þýðingarlaus, enda hefði kærandi brotið ítrekað og gróflega gegn ákvæðum samþykktar um hundahald.

Í úrskurði nefndarinnar kemur fram að hundunum hafi verið komið fyrir utan sveitarfélagsins og því þyki ekki rétt að fresta ákvörðuninni um bann við hundahaldi; „enda liggur fyrir að kærandi verði fyrir óafturkræfu tjóni meðan beðið sé niðurstöðu úrskurðarnefndarinnar um ágreiningsefni máls þess,“ segir í nðurlagi úrskurðarins.

Úrskurðarnefnd hafnar frestun á banni við hundahaldi