Njörður holding ehf. hefur birt í Skipulagsgátt matsáætlun vegna byggingar verksmiðju á Gundartanga þar sem ætlunin er að vinna um 50.000 tonn af magnesíum úr sjó. Í framleiðsluferli myndast klór sem aukaafurð sem einnig verður nýtt.

Matsáætlunin er verkáætlun komandi umhverfismats vegna byggingar verksmiðjunnar og er hún nú kynnt almenningi, hagsmunaaðilum og lögbundnum umsagnaraðilum um fjögurra vikna skeið. Á þessu tímabili gefst þeim sem það vilja tækifæri til að koma með athugasemdir við matsáætlunina. Þá mun Skipulagsstofnun leita umsagna lögboðinna umsagnaraðila.

Eins og fram hefur komið í fréttum Skessuhorns hefur Njörður holding um nokkurt skeið undirbúið byggingu verksmiðjunnar á Grundartanga. Markmið fyrirtækisins er að sögn forsvarsmanna þess að framleiða magnesíum með sjálfbærri orku á Íslandi, styrkja hringrásarhagkerfið og skapa alþjóðlega samkeppnishæfa útflutningsvöru með lágu kolefnisfótspori.

Í matsáætuninni kemur fram að engin magnesíumframleiðsla eigi sér stað í Evrópu í dag. Yfir 90% af heimsframboði magnesíum kemur frá Kína þar sem framleiðslan er unnin með námuvinnslu á dolómíti og aðferðin þarfnast kolabrennslu. Einnig er engin framleiðsla á klór á Íslandi í dag og klórvörur alfarið innfluttar. Stefnt er að því að framleiðslan á Grundartanga verði með nýrri aðferð þar sem ekki er þörf á námuvinnslu eða jarðefnaeldsneyti. Unnið er að þróun hennar en áður en framkvæmdir við Grundartanga hefjast mun fyrirtækið setja upp tímabundna framleiðslulínu til að prófa aðferðina. Gert er ráð fyrri að prófun framleiðsluaðferða verði staðsett á Akranesi og vari ekki lengur en í 2-3 mánuði.

Í matsáætluninni kemur fram að framkvæmdir við verksmiðjuna muni hefjast í september 2027 og standi yfir í 18 mánuði og áætlað er að fullur rekstur geti hafist árið 2029.

Matsáætlun magnesíumverksmiðju í Hvalfirði birt í skipulagsgátt