Bæjarstjórn Akraneskaupstaðar samþykkti í gær kauptilboð í Landsbankahúsið við Akratorg. Söluverð er 70 milljónir króna. Húsið er skráð 1454 fermetrar að flatarmáli og er fermetraverð í sölunni því rúmar 48 þúsund krónur. Brunabótamat hússins er 759,5 milljónir króna. Kaupandinn er Hraun fasteignafélag ehf. en aðstandendur þess félags hafa áður komið að endurbyggingu tveggja fyrrum Landsbankahúsa; í Neskaupsstað og Vestmannaeyjum. Mun ætlun þeirra að í húsinu verði rekið hótel og veitingastaður á neðstu hæð, að lokinni endurbyggingu hússins. Sótt verður um heimild til að byggja eina hæð ofan á húsið en ytra útlit haldi sér að mestu óbreytt.

Allt frá því að Akraneskaupstaður festi kaup á húsinu fyrir um fjórtán árum hafa verið uppi ýmsar hugmyndir um framtíðarnotkun þess því engar endanlegar hugmyndir lágu fyrir í því efni þegar það var keypt á sínum tíma. Var einkum verið horft til þess að breyta því í hótel eða að það yrði nýtt sem ráðhús.

Á síðasta ári var síðan efnt til útboðs á svokölluðum Miðbæjarreit þar sem boðinn var út byggingaréttur á lóðunum Suðurgötu 47, Suðurgötu 47a og Skólabraut 24 auk Suðurgötu 57 þar sem Landsbankahúsið stendur. Tilboðsgjöfum var í sjálfsvald sett hvort húsið yrði rifið vegna hugmynda um uppbyggingu á reitnum. Ekkert tilboð barst. Hins vegar kom þá fram áhugi nokkurra aðila sem leiddi til viðræðna sem nú hafa leitt til sölu.

Eins og fyrr er getið er söluverð hússins 70 milljónir króna. Í framhaldinu munu kaupendur kanna með frekari uppbyggingu á nærliggjandi lóðum og mun samkomulag vera um að kaupendur hafi tíma til að vinna að skipulagi á þeim lóðum og ákveða síðar um kaup á byggingarétti þar.

Akraneskaupstaður selur Landsbankahúsið undir hótel- og veitingarekstur