Byggðarráð Borgarbyggðar hefur að tillögu velferðarnefndar sveitarfélagsins lagt til við sveitarstjórn að grunnfjárhæð fjárhagsaðstoðar við íbúa sveitarfélagsins verði lækkuð úr 274.362 krónum í 200.000 krónur eða um rúmlega 27%.

Í umfjöllun velferðarnefndarinnar kom fram að Borgarbyggð greiði töluvert hærri fjárhæðir miðað við önnur sveitarfélög og um sé að ræða næsthæstu grunnfjárhæð miðað við gögn sem liggja fyrir, árið 2025. Því sé nauðsynlegt að bregðast við þar sem; „fjárhagsaðstöð er orðin verulega íþyngjandi liður í rekstri Borgarbyggðar vegna fjölgunar einstaklinga sem þurfa að reiða sig á fjárhagsaðstoð frá sveitarfélaginu,“ eins og segir síðan orðrétt í bókun byggðarráðsins.

Eins og fram hefur komið í fréttum Skessuhorns hefur fjöldi flóttamanna sem dvelur á Bifröst þurft að leita fjárhagslegs liðsinnis sveitarfélagsins að undaförnu svo mjög að sveitarstjórnarmenn telja að sá kostnaður sé að sliga sveitarfélagið. Hefur sveitarstjórn biðlað til ríkisins um að koma að þeirri fjárhagsaðstoð við litlar merkjanlegar undirtektir.

Í samantekt sem lögð var fyrir velferðarnefnd kom fram að hæsta upphæð fjárhagsaðstoðar er 281.280 krónur í Skagafirði en næst hæst, eins og áður sagði, í Borgarbyggð. Í næstu sætum eru sveitarfélög á höfuðborgarsvæðinu og Akureyri. Af öðrum sveitarfélögum má nefna að í Hvalfjarðarsveit er upphæðin 241.103 krónur, á Akranesi 206.292 krónur og í Snæfellsbæ 196.000 krónur. Af þeim 33 sveitarfélögum sem upplýsingar ná til er upphæðin lægst í Grindarvík 176.500 krónur. Verði tillaga Byggðarráðs Borgarbyggðar samþykkt verður fjárhagsaðstoð sveitarfélagsins sú fimmta lægsta eftir breytinguna.

Borgarbyggð lækkar fjárhagsaðstoð um ríflega fjórðung