Skipulagsstofnun hefur ákveðið að endurvinnsla á saltgjalli og gjallsandi á Grundartanga sé ekki líkleg til að hafa í för með sér umtalsverð umhverfisáhrif samkvæmt viðmiði laga og því sé framkvæmdin ekki háð mati á umhverfisáhrifum.

Það var fyrirtækið Alur álvinnsla sem óskaði eftir áliti Skipulagsstofnunar. Fyrirtækið hefur endurunnið álgjall á Grundartanga frá árinu 2012 og er með starfsleyfi fyrir endurvinnslu. Úr álgjallinu hefur verið unnið ál. Við vinnsluna fellur til svokallað saltgjall og gjallsandur sem hefur hingað til verið sent úr landi til endurvinnslu eða urðað í flæðigryfju við Grundartanga. Alur vinnur úr um sjö til níu þúsund tonnum af álgjalli á ári. Úr því er unnið um 3.500-4.000 tonn af áli. Síðastliðin þrjú ár hefur staðið yfir tilraun um úrvinnslu á saltgjalli og gjallsandi hérlendis. Tilrauninni er að ljúka með jákvæðum árangri.

Í umsögn Umhverfis- og orkustofnunar er ekki talið líklegt að starfsemin valdi áhrifum á magn flúors í sjó og sömu sögu er að segja af Hafrannsóknarstofnun. Í ákvörðun Skipulagsstofnunar kemur fram að umfang fyrirhugaðrar framkvæmdar sé hverfandi. Engar nýjar byggingar eða stækkun athafnasvæðis séu nauðsynlegar vegna framkvæmdanna. Um sé að ræða breytingar á framleiðsluferli þar sem efni sem áður voru ýmist urðuð í flæðigryfjum eða flutt til útlanda til endurvinnslu séu tekin til framleiðslu og úr þeim unnið nýtilegt hráefni í annars konar starfsemi. Þar með dragi úr úrgangsmyndun og afurðin kemur í stað hráefna í annars konar framleiðslu sem hefur jákvæð áhrif í för með sér. Þá segir að Skipulagsstofnun telji, með hliðsjón af fyrirliggjandi gögnum, að framkvæmdin komi til með að hafa fremur jákvæð áhrif á loftgæði þar sem tekur fyrir ammoníakmengun.

Kæra má þessa ákvörðun Skipulagsstofnunar og er kærufrestur til 9. febrúar.

Endurvinnsla á saltgjalli og gjallsandi þarfnast ekki umhverfismats