Bjargfugli einstakra tegunda reiddi misjafnlega af á Snæfellsnesi á liðnu ári. Þetta kemur fram í framvinduskýrslu Náttúrustofu Norðausturlands um vöktun bjargfugla árið 2025 en hún vinnur að vöktuninni á öllu landinu í umboði Umhverfisstofnunar en með aðstoð annarra náttúrustofa. Vöktun fer að stórum hluta fram með vöktunarmyndavélum.

Hvað ritu varðar hefur hreiðrum hennar fjölgað í öllum björgum á milli áranna 2024 og 2025. Mest fjölgaði hreiðrum hennar í Krýsuvíkurbergi eða um 138% og næst mest á Snæfellsnesi um 55%. Varpárangur ritu var bestur á Snæfellsnesi þar sem upp komust 1,28 ungar á hvert hreiður sem er mjög góður árangur miðað við meðaltal áranna 2009-2024. Til samanburðar var varpárangurinn aðeins 0,22 ungar á hreiður í Krýsuvíkurbergi.

Álku fækkaði hins vegar á Snæfellsnesi um 14% á síðasta ári. Í flestum öðrum björgum fjölgaði henni umtalsvert. Stuttnefju fækkaði einnig á Snæfellsnesi eða um 19% á liðnu ári. Í flestum öðrum björgum stóð fjöldinn nokkurn veginn í stað eða jókst. Langvíu fjölgaði um 7% á Snæfellsnesi en í öðrum björgum stóð stofninn í stað eða stækkaði umtalsvert líkt og í Krísuvíkurbergi um 43% og í Ingólfshöfða um 51%. Meðalfjöldi langvíu á Snæfellsnesi hefur ekki verið meiri frá upphafi árlegrar vöktunar. Fýl fjölgaði um 6% á Snæfellsnesi en í heildina hefur fýl verið að fækka á landinu öllu á undanförnum árum eða um 4,3% á ári og um ríflega helming frá árinu 2009.

Frá árinu 2009 hefur svartfugli á Snæfellsnesi vegnað mjög misjafnlega. Rítu hefur fækkað um 35%, álku hefur hins vegar fjölgað um 469% á sama tíma. Stuttnefju hefur á hinn bóginn fækkað um 86%, langvíu fjölgað um 94% en fýl fækkað um 55%.

Misjafnt gengi bjargfugla á Snæfellsnesi