Fjórar fuglategundir eru að mati Náttúrufræðistofnunar í bráðri útrýmingarhættu á Íslandi. Þetta kemur fram nýju riti Náttúrufræðistofnunar, Válisti fugla 2025, sem birt hefur verið á vef stofnunarinnar.

Megintilgangur með útgáfunni er að draga fram hvaða tegundir eru í útrýmingarhættu hér á landi og veita upplýsingar sem styðja við aðgerðir til verndar náttúrunni. Válistinn er unninn samkvæmt viðmiðunum Alþjóðanáttúruverndarsambandsins þar sem tegundir eru flokkaðar í hættuflokka á grundvelli gagna um útbreiðslu, stofnstærð og breytingar á stofnum.

Niðurstöðurnar sýna að af 91 metinni fuglategund eru 43 á válista, ein tegund er útdauð á heimsvísu og þrjár eru ekki lengur varpfuglar á Íslandi. Af þeim tegundum sem teljast í hættu eru fjórar í bráðri hættu, tíu í hættu og 25 í nokkurri hættu. Að auki eru 19 tegundir taldar í yfirvofandi hættu.

Eins og alþjóð veit er það geirfuglinn sem er útdauður á heimsvísu. Haftyrðill, gráspör og keldusvín teljast ekki lengur varpfuglar á Íslandi. Skúmur, lundi, fjöruspói og svartbakur eru þær fuglategundir sem teljast í bráðri hættu. Blesgæs, duggönd, sendlingur, fálki, fýll, haförn, sjósvala, hvítmáfur, þórshani og kjói teljast tegundir í hættu.

Eyrugla, snæugla, húsönd, lóuþræll, teista, hrafn, himbrimi, tjaldur, stormsvala, dvergmáfur, gargönd, gulönd, súla, spói, snjótittlingur, heiðlóa, skrofa, rita, skógarsnípa, skeiðönd, barrfinka, fjallkjói, kría, stelkur, stuttnefja, grafönd, urtönd, grágæs, tildra, brandugla, skúfönd, toppskarfur, straumönd, sílamáfur, rjúpa, silfurmáfur, jaðrakan, rauðhöfðaönd, toppönd, óðinshani, flórgoði, æðarfugl, músarrindill og langvía eru þær tegundir sem teljast í yfirvofandi hættu.

Fjórar fuglategundir metnar í bráðri útrýmingarhættu á Íslandi