Síðasta samantekt frá Lögreglunni á Vesturlandi til Skessuhorns var miðuð við 15. desember síðastliðinn. Hér á eftir er samantekt af því helsta sem gerst hefur síðan.

Á þessum þremur vikum hafa 36 ökumenn verið kærðir fyrir of hraðan akstur. Tveir ökumenn voru handteknir grunaðir um ölvun við akstur og sex handteknir grunaðir um akstur undir áhrifum fíkniefna.

Tvær tilkynningar bárust lögreglu um eignaspjöll um hátíðirnar. Fyrst var tilkynnt um að rúður hefðu verið brotnar í strætóskýli á Akranesi. Seinna atvikið var á hóteli í Borgarnesi þar sem tilkynnt var um einstakling sem virtist vera í annarlegu ástandi. Viðkomandi hafði brotið glas inni á hótelinu og þegar hann fór út þá hafði hann tekið með sér vínflösku. Lögreglan hafði afskipti af honum í nágrenninu.

Skemmtanahald um jól og áramót gekk að mestu leyti vel, að sögn lögreglu. Tveir stórir dansleikir voru haldnir á Akranesi; á öðrum degi jóla og svo á áramótum. Lögreglan var með töluverðan mannskap á vakt í kringum þessa viðburði sem voru vel sóttir.

Þá kemur fram í dagbók lögreglu að hún fór í þrjú mál um hátírnar þar sem grunur var um að heimilisofbeldi hafi átt sér stað. Í flestum tilvikum hafði áfengis verið neytt. Í fimm aðskildum málum fundust fíkniefni. Ýmist fundust fíkniefnin inni á heimili, á aðilum eða þá að þau fundust á vettvangi þar sem aðilar sem lögreglan hafði afskipti af höfðu verið.

Slys varð á nýju ári þegar flugeldur sprakk í hendi einstaklings sem var að reyna að skjóta honum upp. Viðkomandi var fluttur á sjúkrahúsið á Akranesi til aðhlynningar. Lögreglan sinnti níu umferðarslysum í umdæminu. Flest voru þau minniháttar, en í byrjun árs var bifreið ekið útaf Vestfjarðarvegi í Dalabyggð. Þrír voru í bifreiðinni og voru meiðsl þannig að talið var þörf á að kalla til aðstoðar þyrlu Landhelgisgæslunnar við flutning.

Ýmsar tilkynningar um þjófnaði komu til kasta lögreglu. Má þar nefna þjófnaði úr verslunum, þjófnað á dósum og þjófnaði á rafhlaupahjóli. Lögreglan hafði afskipti af níu ökumönnum ökutækja vegna skorts á réttindum til þess að aka þeim.

Loks hélt lögregla umferðargetraun fyrir nemendur í 5. bekk allra grunnskóla í umdæminu. Rétt fyrir jól fóru svo lögreglumenn um umdæmið og afhentu verðlaun fyrir getraunina.

Tíðindi af vettvangi lögreglu um hátíðirnar