Skatturinn hefur dregið Grundarfjarðarbæ á svörum við fyrirspurn svo mánuðum skiptir þrátt fyrir ítrekanir af hálfu bæjarstjóra. Forsaga málsins er sú að 23. júní 2025 sendi Björg Ágústsdóttir bæjarstjóri erindi á skrifstofu Skattsins þar sem óskað var gagna frá embættinu vegna greiningarvinnu sem er í gangi hjá bæjarfélaginu.

Í erindi bæjarstjóra kemur fram að greiningarvinnan nái til tekna með það að markmiði að meta hvort vera kunni að tekjur séu vanframtaldar til skatts og útsvars með vísan til ákvæða laga um tekjuskatt. „Í þessari greiningarvinnu hefur komið upp að mikill munur virðist vera á launagreiðslum lítilla og meðalstórra lögaðila eftir heimilisfesti þeirra,“ segir orðrétt í erindi bæjarstjóra. Einkum virðist þetta snúa að þeim einstaklingum sem eiga einkahlutafélög, einkum skiptinu meðaltekna þeirra annars vegar og heildarfjármagnstekjur þeirra hins vegar. Óskaði bæjarstjóri eftir upplýsingum tíu ár aftur í tímann.

Þá var einnig óskað samanburðar á skatttekjum bæjarins við tekjur annarra sveitarfélaga og eru þar nefnd Snæfellbær, Stykkishólmur, Bolungarvík, Húnabyggð og Vopnafjarðarhreppur. Þegar ekki höfðu borist svör í haust ítrekaði bæjarstjóri erindið með tölvupósti 9. september, 11. september, 16. september og 8. október. Bæjarstjóri sendir síðan 2. desember enn einn tölvupóstinn og þar er sagt að þrátt fyrir að liðnir séu fimm mánuðir og rúm vika frá upphaflegu erindi hafi enn ekkert svar borist og ekki heldur viðbrögð með skilaboðum um það hvenær vænta megi svars og þess óskað að svar berist eigi síðar en 10. desember.

Við þessari ítrekun bæjarstjórans barst sjálfvirkt svar þar sem segir: „Erindi þitt hefur verið móttekið og mun verða tekin afstaða til þess svo fljótt sem kostur er. Vegna mikils álags getur dregist að svara fyrirspurn þinni. Beðist er velvirðingar á þeim óþægindum sem þetta kann að valda,“ segir orðrétt í sjálfvirka svarinu. Síðan er klikkt út með eftirfarandi: „Vinsamlega sendið ekki sama póstinn oftar en einu sinni.“

Á fundi bæjarráðs Grundarfjarðarbæjar 18. desember kynnti bæjarstjóri málið og þá hafði enn ekkert svar borist frá Skattinum. Á fundinum tilkynnti bæjarstjóri að leitað hafi verið til fjármálaráðherra og Sambands íslenskra sveitarfélaga vegna þeirrar stöðu sem upp er komin þegar Skatturinn svarar ekki erindi sveitarfélags sem vill greina útsvarstekjur sínar með réttmætum hætti eins og segir í bókun bæjarráðsins.

Skatturinn dregur Grundarfjarðarbæ svara svo mánuðum skiptir