Vegna fréttar hér á vef Skessuhorns í gær, þar sem fjallað var um skammtímadvöl fatlaðra barna, vilja bæjarfulltrúarnir Kristinn Hallur Sveinsson og Einar Brandsson á Akranesi, sem jafnframt eru formaður og varaformaður velferðar- og mannréttindaráðs, koma eftirfarandi á framfæri:

„Fulltrúar í velferðar- og mannréttindaráði Akraneskaupstaðar hafa um nokkurt skeið haft það að markmiði að koma á skammtímavistun fyrir fötluð börn á Akranesi. Þrátt fyrir þann vilja hafa ekki skapast aðstæður til framkvæmdar, meðal annars vegna skorts á hentugu húsnæði.

Í vetur kom fram hugmynd um að kanna mögulegt samstarf sveitarfélaga á Vesturlandi um sameiginlega skammtímavistun. Ráðið tók jákvætt í að taka þátt í því samtali, þó ávallt með þeim skýra fyrirvara að staðsetning yrði rædd frekar og að markmið Akraneskaupstaðar væri áfram að slíkt úrræði yrði byggt upp hér á Akranesi. Starfsfólk Akraneskaupstaðar tók í kjölfarið þátt í samtali við starfsfólk annarra sveitarfélaga sem leiddi til draga að viljayfirlýsingu um samstarf og mögulega útfærslu þess.

Þegar drög að viljayfirlýsingu voru lögð fyrir ráðið var tekið jákvætt í þau, með þeim fyrirvara að skýrar kæmi fram að staðsetning og rekstrarform yrðu til umræðu í áframhaldandi vinnu. Fulltrúar Akraneskaupstaðar voru síðan boðaðir til undirritunar viljayfirlýsingar með skömmum fyrirvara og án þess að hafa fengið endanlega útgáfu hennar til yfirlestrar.

Þegar fulltrúar Akraneskaupstaðar voru boðaðir til undirritunar viljayfirlýsingar barst endanleg útgáfa hennar ekki fyrr en að morgni undirskriftardags. Þá kom í ljós að gengið var út frá ákveðinni staðsetningu, í Holti í Borgarfirði, án þess að gert væri ráð fyrir frekari umræðu um staðsetningu, þrátt fyrir fyrri fyrirvara af hálfu Akraness. Viljayfirlýsingi um sameiginlega uppbyggingu skammtímadvalar fyrir fatlaða á Vesturlandi var því orðin um uppbyggingu skammtímadvalar í Holti. Þessi útfærsla hafði hvorki verið samþykkt né rædd til hlítar í pólitísku umboði hér í bænum.

Í ljósi þessa var óskað eftir fresti til að ræða málið frekar og eftir að texti viljayfirlýsingarinnar yrði aðlagaður þeim fyrirvörum sem áður höfðu verið gerðir. Ekki var orðið við þeim óskum. Einnig teljum við eðlilegt að kynna hefði átt slíka ákvörðun í notendaráði fatlaðra og að haft hefði verið víðtækara samráð, enda ekkert sem krafðist þess að hraða málinu með þessum hætti.

Við, undirritaðir, viljum árétta að við höfum verið og erum áfram fylgjandi uppbyggingu skammtímavistunar fyrir fötluð börn á Akranesi og vorum jafnframt opnir fyrir samtali og samvinnu við önnur sveitarfélög. Það samtal fór hins vegar ekki fram með þeim hætti sem upphaflega var gert ráð fyrir,“ segir í yfirlýsingu þeirra Kristins Halls og Einars.

Þá vilja þeir Kristinn Hallur og Einar jafnframt árétta að fyrirsögn fréttar á skessuhorn.is í gær telja þeir villandi. „Samstarf hafði ekki verið formlega komið á og því ekki rétt að tala um að hætt hafi verið við samstarf. Við förum því fram á að fyrirsögnin verði leiðrétt og að í framtíðinni verði leitað til allra hlutaðeigandi aðila til að tryggja jafnvægi og nákvæmni í umfjöllun.“

Árétta að formlegt samstarf hafi ekki verið komið á um skammtímavistun