Nýtt fasteignamat tók gildi um áramótin og urðu þar nokkrar breytingar eftir gerð og staðsetningu eigna. Að meðaltali hækkar fasteignamat á landinu öllu um 9,2% frá fyrra mati. Áætlað heildarvirði fasteigna á landinu öllu er 17.300 milljarðar króna eða með öðrum orðum 17,3 billjónir króna.

Af sveitarfélögum á Vesturlandi er fasteignamatið hæst á Akranesi rúmir 272 milljarðar króna, í Skorradalshreppi er fasteignamatið tæpir 26 milljarðar króna, í Hvalfjarðarsveit er matið tæpir 88 milljarðar, í Borgarbyggð tæpir 183 milljarðar, í Grundarfjarðarbæ er matið tæpir 21 milljarður króna, í Eyja- og Miklaholtshreppi tæpir 5 milljarðar, í Snæfellsbæ rúmir 39 milljarðar, í Stykkishólmi tæpur 41 milljarður króna og í Dalabyggð er fasteignamatið tæpur 21 milljarður króna.

Athyglisvert er að skoða hversu misjafnt fasteignamat eignaflokka skiptist á milli sveitarfélaga. Á Akranesi vegur íbúðarhúsnæði tæplega 85% af heildarfasteignamati á meðan atvinnueignir vega einungis rúmlega 8%. Í Skorradalshreppi vega sumarhús hins vegar ríflega 88 % af fasteignamati. Í Hvalfjarðarsveit vega atvinnueignir tæplega 49% af fasteignamati, íbúðareignir 21% og sumarhús 19%. Í Eyja- og Miklaholtshreppi vega jarðir hins vegar ríflega 53% af heildarmati og í Dalabyggð er mat jarða tæplega 43% af heildarmati.

Þá er líka afar athyglisvert að skoða fasteignamat að baki hverjum íbúa. Þar trónir Skorradalshreppur á toppnum. Ríflega 352 milljónir króna eru að baki hverjum íbúa, næst kemur Eyja- og Miklaholtshreppur með 168 milljónir króna og Hvalfjarðarsveit með rúmar 103 milljónir króna. Þessi þrjú sveitarfélög skera sig úr öðrum sveitarfélögum á Vesturlandi. Borgarbyggð kemur þar næst með ríflega 42 milljónir á hvern íbúa, að baki hverjum íbúa á Akranesi eru tæpar 32 milljónir, í Dalabyggð er tæp 31 milljón króna, í Stykkishólmi rúmar 30 milljónir króna, í Grundarfirði eru rúmar 23 milljónir króna að baki hverjum íbúa og lægst er talan í Snæfellsbæ eða tæplega 23 milljónir króna í fasteignamat á hvern íbúa.

Fasteignamat eigna á Vesturlandi 870 milljarðar króna