Stór hluti nemenda grunnskóla á Vesturlandi, sem og landinu öllu, nýtur sérkennslu eða stuðnings. Þetta kemur meðal annars fram í svari mennta- og barnamálaráðherra á Alþingi við fyrirspurn Jóns Péturs Ziemsen um stöðu og árangur í grunnskólum landsins.

Í upphafi fyrirspurnar sinnar óskar þingmaðurinn svara við því hvaða lestrarkennsluaðferð sé notuð í grunnskólum landsins. Í svari ráðherra kemur fram að aðalnámskrá mæli ekki fyrir um tiltekna lestrarkennsluaðferð í skólum hér á landi og ekki sé safnað upplýsinga um kennsluaðferðir í einstökum skólum. Kennarar og skólar hafi faglegt frelsi til að velja námsefni, kennsluðferðir og vinnubrögð með það að markmiði að nemendur nái þeirri hæfni sem að er stefnt.

Þá óskaði þingmaðurinn svara við því hversu stór hluti nemenda í grunnskólum landsins sé ekki með íslensku sem móðurmál eða þurfi sérkennslu með einhverjum hætti eða geti ekki stundað nám í hefðbundnum hópum vegna hegðunarerfiðleika og þurfi stuðning af þeim sökum. Í svari ráðherra kemur fram að árið 2024 hafi 16,2% grunnskólanemenda á landinu öllu haft annað móðurmál en íslensku. Af einstökum sveitarfélögum með yfir 1.000 íbúa má nefna að á Akranesi er hlutfallið 9,1%, í Borgarbyggð 15,8%, í Snæfellsbæ 22,1% og í Stykkishólmi 9,2%.

Hvað sérkennslu og stuðning varðar vísaði ráðherra í svari sínu til upplýsinga frá því árið 2023. Á Akranesi og í Borgarbyggð var hlutfall þeirra grunnskólabarna sem þarfnast stuðnings 16,7%, þar af drengir 20,9% og stúlkur 12,3%. Í Grundarfjarðarbæ, Snæfellsbæ og Stykkishólmi var hlutfallið 35,4% þar af 38,8% drengja og 31,4% stúlkna. Í Hvalfjarðarsveit, Eyja- og Miklaholtshreppi og Dalabyggð var hlutfallið 31,9% þar af 24,7% drengja og 39,6% stúlkna.

Hæst var hlutfallið á landinu í sveitarfélögum á Vestfjörðum með færri íbúa en 1.000 eða 53% þar af 61% drengja og 44,6% stúlkna. Lægst var hlutfallið hins vegar á Akranesi og í Borgarbyggð.

Einnig óskaði þingmaðurinn eftir upplýsingum um hversu margir nemendur í 10. bekk teljist „skara fram úr“ samkvæmt hæfniþrepum PISA. Í svari ráðherra kemur fram að upplýsingar liggi fyrir vegna ársins 2022 en þær hafi ekki verið birtar niður á sveitarfélög með þeim rökum að PISA sé ekki ætlað að mæla hæfni einstakra nemenda eða skóla. Í heildartölum fyrir landið allt kemur fram að árið 2022 hafi 5% nemenda skarað fram úr í stærðfræðilæsi, í læsi á náttúruvísindi skara 2% nemenda fram úr og í lesskilningi 3%.

Að sama skapi óskaði þingmaðurinn upplýsinga um hversu stórt hlufall nemenda í 10. bekk teljist „langt á eftir“. Í stærðfræðilæsi er hlutfallið 34%, í náttúruvísindum 36% og í lesskilningi teljast 40% nemenda langt á eftir. Í lok svars ráðherra kemur fram að hann telji ekki þörf á sérstöku samræmdu lokamati nemenda að loknu tíu ára skyldunámi en bendir á að sveitarfélögum og skólum sé heimilt að leggja slík próf fyrir nemendur.

Stór hluti nemenda grunnskóla nýtur sérkennslu eða stuðnings