Hvatasjóður styrkir Keilufélag Akraness til að kynna íþróttina fyrir fötluðum

Meðal styrkþega í síðustu úthlutun Hvatasjóðs ÍSÍ og UMFÍ er Keilufélag Akraness. Hvatasjóður íþróttahreyfingarinnar er nýr sjóður sem úthlutað hefur verið úr í þrígang. „Sjóðurinn styrkir verkefni sem miða að útbreiðslu íþrótta og aukinni þátttöku barna í íþróttum með áherslu á þátttöku barna með fötlun, af tekjulægri heimilum og með fjölbreyttan tungumála- og menningarbakgrunn,“ eins og segir í lýsingu á Hvatasjóði.

Keilusalurinn á Akranesi er í kjallara íþróttahússins við Vesturgötu. Keilufélagið verður 25 ára undir lok næsta árs en félagið stendur fyrir fjölbreyttu starfi yngri og eldri keiluspilara. Hjónin Guðmundur Sigurðsson og Jónína Björg Magnúsdóttir eru frumkvöðlar að stofnun félagsins og enn standa þau vaktina. Guðmundur er fastur starfsmaður keilufélagsins og sinnir þjálfun á afrekssviði. Jónína Björg og Ólafur Sveinn Ólafsson sinna öðrum iðkendum. Guðmundur er reyndar í stuttu veikindaleyfi vegna liðskipta og ræddi blaðamaður við Jónínu Björg um styrkinn úr Hvatasjóði.

„Þessi styrkur úr Hvatasjóði var upp á 700 þúsund krónur og er eyrnamerktur því að bæta möguleika fatlaðra til að stunda keilu og ná auk þess til íbúa utan Akraness í því sambandi. Það hefur verið draumur okkar frá upphafi að allir geti átt möguleika á að spila keilu, enda er þetta skemmtileg íþrótt sem hentar öllum allt frá barnsaldri til fullorðinsára. Til marks um það eru best sóttu æfingatímarnir þegar eldri borgarar mæta í salinn,“ segir Jónína.

Fyrir ekki svo löngu var sett lyfta til að auðvelda aðgengi að kjallaranum þar sem keila og píla er til húsa við Vesturgötuna. „Lyftan bætir aðgengið til muna og er í raun forsenda fyrir því að við getum boðið fólki með fötlun að æfa hjá okkur. Við höfum verið með grunnskólanemendur hjá okkur en langaði til að auðvelda möguleika fólks með fötlun til að mæta og sóttum því um þennan styrk. Fengum svo úthlutað en styrkurinn er eyrnamerktur því að kynna möguleika fatlaðra á öllu Vesturlandi til að koma og prófa að æfa og spila keilu. Oft getur verið erfitt að samræma tíma sem hentar mörgum í einu og því sýnum við sveigjanleika. Einstaklingar með liðveislu og/eða notendastýrða persónulega aðstoð, NPA, geta haft samband við okkur til að bóka tíma. Þeir einstaklingar geta alveg eins verið búsettir á öðrum stöðum hér á Vesturlandi. Ef það fellur ferð suður, til dæmis til læknis eða í öðrum erindum, er kannski hægt að sameina keiluferð í leiðinni,“ segir Jónína.

Hún segir að fólk á Akranesi með fötlun hafi nýtt sér keilusalinn í mörg ár, ýmist eitt eða með liðveislu. „Nú hvetjum við semsagt fólk í öðrum byggðarlögum til að mæta, enda er keilusali ekki víða að finna. Jónína segir að upplýsingar um almennan opnunartíma sé að finna á heimasíðunni keilusalurinn.is en auk þess sé hægt að senda tölvupóst á kfa@simnet.is til að finna tíma.

Keilufélagið leigir út sal og aðstöðu til að vinnustaðahópar geti bókað tíma og þá er algengt að leigja salinn út fyrir barnaafmæli og aðra viðburði, enda fáir salir sem hægt er að fá leigða út í bæjarfélaginu til slíkra mannamóta.

Keilufélag Akraness hefur undir forystu Guðmundar og Jónínu stuðlað að því að hundruðir íbúa hafa kynnst íþróttinni. Félagið hefur á þessum tíma getið af sér fjölmargt afreksfólk í keilu og undantekning ef einhverjir úr félaginu komast ekki á verðlaunapall á stórmótum og í landslið Íslands í keilu.

Keila fyrir alla

Hvatasjóður styrkir Keilufélag Akraness til að kynna íþróttina fyrir fötluðum

Hvatasjóður styrkir Keilufélag Akraness til að kynna íþróttina fyrir fötluðum