Fyrsta lögregluembættið í Evrópu til að kaupa Tesla Y til löggæslustarfa

Í byrjun þessa mánaðar fagnaði Lögreglan á Vesturlandi þeim áfanga að hafa ekið lögreglubifreiðum sínum alls milljón kílómetra á rafmagni. „Er þetta sérstakt fagnaðarefni þar sem Lögreglan á Vesturlandi er eina lögregluembættið á landinu sem er komið með öll fimm grænu skref Umhverfisstofnunar. Akstur hefur verið langstærsti þátturinn í losun gróðurhúsalofttegunda lögreglunnar,“ segir í frétt á FB síðu embættisins.

Það var í í ársbyrjun 2022 sem fulltrúar frá lögreglunni á Vesturlandi fóru til Englands að heimsækja tvö lögregluembætti sem höfðu tekið í notkun lögreglubifreiðar af gerðinni Tesla 3. Var reynsla þeirra metin og ákveðið að endurnýja bílaflota Lögreglunnar á Vesturlandi í Tesla Y 4×4, sem hentaði betur fyrir íslenskar aðstæður.

„Frá árinu 2023 hefur Lögreglan á Vesturlandi unnið markvisst í því að skipta út bifreiðum sem nota jarðefnaeldsneyti, yfir í Tesla Y sem nota endurnýjanlega orku. Varð Lögreglan á Vesturlandi þar með fyrsta lögregluembættið í Evrópu til að nota Tesla Y við löggæslustörf. Á stuttum tíma hefur náðst að draga úr losun gróðurhúsalofttegunda um tæp 85%, miðað við árið 2020, þó akstur lögreglubifreiða hafi aukist.“

Þá segir lögregla að bifreiðarnar hafi staðist allar væntingar varðandi aksturhæfni, eru mjög áreiðanlegar, rekstraröryggi hefur verið framúrskarandi og viðhaldskostnaður miklu lægri en í hefðbundum lögreglubifreiðum. Hleðslustöðvum hefur verið komið upp við lögreglustöðvar embættisins og sinna þær um 90% af orkuþörf bifreiðanna. Þrátt fyrir að embættið sé landstórt og miklar vegalengdri á milli staða hafa lögreglubifreiðar embættisins ekki orðið rafmagnslausar.

„Frá upphafi hafa starfsmenn embættisins tekið þátt í langtíma markmiðum embættisins í umhverfismálum. Með góðri upplýsingagjöf til starfsmanna og samvinnu hefur orðið mikil vitundarvakning um umhverfismál hjá embættinu. Mikil ánægja er meðal lögreglumann embættisins með rafmagnsdrifnar lögreglubifreiðar og hafa mjög margir fjárfest í samskonar bifreiðum til einkanota. Markmið Lögreglunnar á Vesturlandi í loftslagsmálum verða áfram háleit og er stefnan sett á að minnka losun gróðurhúsalofttegunda um 95%, miðað við árið 2020, fyrir árið 2030.“

Hafa ekið milljón kílómetra á rafmagni

Fyrsta lögregluembættið í Evrópu til að kaupa Tesla Y til löggæslustarfa

Fyrsta lögregluembættið í Evrópu til að kaupa Tesla Y til löggæslustarfa