Hér er horft yfir Grjótháls sem er milli Þverárhlíðar og Norðurárdals í Borgarfirði. Í nýsamþykktu aðalskipulagi Borgarbyggðar eru engin vindorkuver heimiluð á skipulagstímanum og engin svæði afmörkuð fyrir vindorkuver. Sveitarfélagið byggir afgreiðslu sína á því. Hundrað metra mælimastur var á árinu reist á hálsinum til að mæla þar vind. Ljósm. Mats Wibe Lund
Byggðarráð hafnar beiðni Sólar um undirskriftasöfnun
Byggðarráð Borgarbyggðar hafnaði á fundi sínum í gær beiðni náttúruverndarsamtakanna Sólar til framtíðar um að efnt yrði til undirskriftarsöfnunar til stuðnings almennri atkvæðagreiðslu um aðalskipulag fyrir Borgarbyggð 2025-2037. Umrætt aðalskipulag var samþykkt á fundi sveitarstjórnar 9. október síðastliðinn. Skömmu síðar sendu samtökin erindi til sveitarstjórnar þar sem óskað var eftir áðurnefndri undirskriftarsöfnun og eftir atvikum síðar atkvæðagreiðslu meðal íbúa um aðalskipulagið.