Segir Kristinn Jónasson bæjarstjóri um nýja samgönguáætlun

Kristinn Jónasson bæjarstjóri í Snæfellsbæ segir framkomna Samgönguáætlun fagnaðarefni því verði hún samþykkt hverfi sú óvissa sem ríkt hefur í málaflokknum undanfarin ár. Um innihald áætlunarinnar, forgangsröðun og fjárveitingar til einstakra verkefna sé og verði alltaf skiptar skoðanir því ekki séu nægilegir fjármunir til skiptanna. Kristinn segir að í sínum huga verði að fagna öllum hugmyndum að samgöngubótum hvar sem er á landinu. „Fáir eða engir þættir skipta meira máli í lífsbaráttu þjóðar en samgöngur. Framfarir í samgöngum skipta sköpum í svo mörgum þáttum daglegs lífs að við verðum ávallt í grunninn að fagna hverju samgönguverkefni,“ segir Kristinn í samtali við Skessuhorn.

Aðspurður um hlut Vesturlands í samgönguáætluninni segir hann þar sjá marga jákvæða þætti. Það sé fagnaðarefni að framkvæmdir við Sundabraut virðist nú loksins vera að komast á rekspöl. Tilkoma hennar mun ekki valda síðri straumhvörfum en gerð Hvalfjarðarganga á sínum tíma. Þá sé líka fagnaðarefni að ljúka eigi framkvæmdum á Kjalarnesi.

Kristinn segir einnig fagnaðarefni sð framkvæmdir nýs vegar um Skógarströnd séu komnar á áætlun. Sú framkvæmd muni opna marga möguleika. Þrátt fyrir að sú framkvæmd sé ekki á áætlun á allra næstu árum sé hún engu að síður komin á áætlun og það séu gleðileg tímamót. Þá er í áætluninni gert ráð fyrir talsverðum hafnarframkvæmdum á Snæfellsnesi. Kristinn segist hafa vonast til þess að þær yrðu framar í tíma en brýn þörf er á framvæmdum og kemur það fram í áætluninni.

Þá segir Kristinn að við fyrstu sýn virðist sem að auknu fjármagni verði varið til viðhalds vega á næstu árum sem hafi verið löngu tímabært. Þar megi bókstaflega engan tíma missa svo mjög hafi hlaðist upp viðhaldsþörf sem afar brýnt sé að reynt verði að vinna á sem allra fyrst.

„Mér sýnist íbúar á Vesturlandi megi nokkuð vel við una þó að sjálfsögðu vilji flestir hafa sín verkefni framar í röðinni. Í þessari áætlun eru tekin á dagskrá mörg verkefni sem barist hefur verið fyrir lengi og því ber að fagna. Það er grundvallaratriði að við göngum áfram veginn í samgöngumálum. Að fjárveitingavaldið viðurkenni hversu afgerandi þáttur góðar samgöngur eru í daglegu lífi fólks. Þegar það liggur fyrir getum við svo rætt forgangsröðun,“ segir Kristinn Jónasson að lokum.

„Betri samgöngur koma okkur öllum til góða“

Segir Kristinn Jónasson bæjarstjóri um nýja samgönguáætlun

Segir Kristinn Jónasson bæjarstjóri um nýja samgönguáætlun