Flestir sem komast á áttræðisaldur hætta störfum á almennum vinnumarkaði og jafnvel fyrr ef þeir hafa tök á því. En það er ekki í tilfelli allra. Valdimar Þorvaldsson á Akranesi stofnaði á 71 árs afmælisdegi sínum fyrir viku síðan fyrirtækið Valdimar Þorvaldsson ehf. Hann hyggst bjóða upp á daglega vöruflutninga frá Reykjavík til Akraness alla daga og innanbæjar eftir þörfum á Benz sendiferðabíl sem hann festi nýverið kaup á. „Ég prófaði að fara á lífeyrissjóð og fá ellilífeyri frá Tryggingastofnun. Komst fljótlega að því að við það lækkaði ég um hundrað þúsund krónur útborgað á mánuði miðað við þau laun sem ég hafði. Og voru þau þó ekki há. Ég hef enn fulla starfsorku og er við góða heilsu. Ég er því fyrst og fremst að stofna nýtt fyrirtæki til að skapa mér atvinnu, langar ekki að setjast í helgan stein,“ segir Valdimar í samtali við Skessuhorn. Á morgun, mánudaginn 1. desember, fer hann fyrstu ferðina til Reykjavíkur að sækja vörur. „Ef einhverjir vilja nýta ferðina er síminn hjá mér 899-9755.

Svo verður bara tíminn að leiða í ljós hvort eftirspurn verður eftir þjónustunni. Ef maður heldur heilsu og nennu til að vinna, og einhver vill eiga við mig viðskipti, þá er þetta bara í fínu lagi. Ég mun ábyrgjast að bjóða samkeppnishæft verð fyrir þjónustuna,“ segir hann.

Valdimar segist ekki skulda krónu í bílnum en það hafi verið ströggl að fá starfsleyfið. „Það tók mig rúmar þrjár vikur að fá leyfi frá Samgöngustofu til farmflutninga. Mér var aldrei sagt hvað vantaði upp á að leyfið fengist gefið út. Það var svo ekki fyrr en endurskoðandinn minn ráðlagði mér að bæta einni milljón króna við í hlutafé að leyfið var umsvifalaust gefið út,“ segir hann.