Hyggjast endurskoða þjónustusamninga milli sveitarfélaganna

Á fundi bæjarráðs Akraneskaupstaðar síðastliðinn fimmtudag voru rædd viðbrögð við afgreiðslu sveitarstjórnar Hvalfjarðarsveitar þess efnis að hafna beiðni Akraneskaupstaðar um að setja á laggirnar stýrihóp sem taki saman eða láti taka saman greiningu óháðs aðila á kostum og göllum þess að sveitarfélögin verði sameinuð. Sveitarstjórn Hvalfjarðarsveitar afgreiddi erindið á fundi sínum síðastliðinn miðvikudag eins og greint var frá í frétt Skessuhorns.

Fram kemur í bókun bæjarráðs, sem samþykkt var einróma, að bæjarráð harmar að sveitarstjórn Hvalfjarðarsveitar hafi ákveðið að verða ekki við ósk um könnun óháðs aðila á kostum og göllum sameiningar sveitarfélaganna. „Við teljum að slík athugun hefði getað orðið fagleg, gagnsæ og til hagsbóta fyrir íbúa beggja sveitarfélaga – án þess að fyrir lægi ákvörðun eða skuldbinding um sameiningu. Við teljum að niðurstöður frá óháðum aðila um kosti og galla sameiningar ásamt kynningu fyrir íbúa hefði getað veitt íbúum beggja sveitarfélaga mikilvægar upplýsingar til að vita hvaða þýðingu sameining hefði. Sérstaklega hefðu slíkar upplýsingar getað orðið gagnlegar fyrir íbúa áður en gerð yrði viðhorfskönnun um hug íbúa til sameiningarmála, eins og fram kemur í bókun sveitarstjórnar að til standi að gera samhliða sveitarstjórnarkosningum á komandi vori.“

Þjónustusamningar endurskoðaðir

Þá segir í bókun bæjarráðs: „Ljóst er að þessar breytingar munu hafa áhrif á núverandi þjónustusamninga sveitarfélaganna og kalla á endurskoðun þeirra, þar sem gjaldtaka þarf að taka mið af raunverulegum kostnaði og rekstrarumfangi. Að okkar mati hefði sameiginleg greining á framtíðarsamstarfi, þar á meðal mögulegri sameiningu, getað auðveldað sveitarfélögunum að bregðast sameiginlega við þessum breytingum.“

Í framhaldi þessa fól bæjarráð bæjarstjóra og sviðsstjórum að taka saman yfirlit yfir alla samninga sem í gildi eru um samstarf Akraness og Hvalfjarðarsveitar, með upplýsingum um kostnaðarskiptingu milli sveitarfélaganna og samanburði við raunkostnað Akraneskaupstaðar við veitta þjónustu, að meðtalinni kostnaðarhlutdeild í rekstri yfirstjórnar kaupstaðarins. Þá skal taka saman yfirlit yfir alla þá þjónustu sem Akraneskaupstaður veitir og íbúar Hvalfjarðarsveitar nýta sér án þess að um þjónustuna hafi verið gerður sérstakur samningur milli sveitarfélaganna eða hann ekki endurnýjaður. Loks skulu bæjarstjóri og sviðsstjóri gera mat á stöðu þessara samstarfssamninga og þjónustuþátta með tilliti til boðaðra breytinga á sveitarstjórnarlögum, sérstaklega hvað varðar reglur um að kostnaðarskipting byggi á raunkostnaði og heimildir til að reikna sérstakt álag vegna veittrar þjónustu.

Bæjarráð harmar afstöðu Hvalfjarðarsveitar til sameiningarmála

Hyggjast endurskoða þjónustusamninga milli sveitarfélaganna

Hyggjast endurskoða þjónustusamninga milli sveitarfélaganna