Úrslit kynnt í ljóðasamkeppni Júlíönu og Barnó

Niðurstöður í ljóðasamkeppni Júlíönu – hátíðar sögu og bóka í Stykkishólmi og Barnó – Best, mest, vest liggja nú fyrir. „Ljóst er að skáldagyðjan hefur heimsótt ungu ljóðasmiðina á Vesturlandi af miklum krafti. Keppnin, sem opin var öllum nemendum á mið- og unglingastigi grunnskólanna í landshlutanum, vakti góð viðbrögð og bárust mörg ljóð víða að af Vesturlandi,“ segir Sigursteinn Sigurðsson menningarfulltrúi Vesturlands.

Það var Brynhildur Eyja Jóhannesdóttir, nemandi í 6. bekk Grunnskóla Borgarfjarðar, sem bar sigur úr býtum með ljóðið „Litla ljóðið“. Í öðru sæti varð „Hesturinn“ eftir Bjarteyju Ebbu Júlíusdóttur, nemanda í Grunnskólanum í Grundarfirði. Þriðja sætið hlaut Carmen Bylgja Arnarsdóttir, nemandi í Grunnskóla Snæfellsbæjar – Lýsuhólsskóla, fyrir tvö ljóð í seríu, „Ég“ og „Ég II“.

„Með ljóðasamkeppninni vilja Júlíana og Barnó hvetja ungt fólk til að tjá sig í bundnu máli, æfa skapandi skrif og sjá hve öflug ljóðlist getur sprett úr hugmyndum barna og unglinga. Þátttakan sýnir að mikil sköpunarkraftur býr meðal ungs fólks á Vesturlandi,“ segir Sigursteinn.

Dómnefnd skipuðu Gunnar Theódór Eggertsson rithöfundur, Dagbjört Höskuldsdóttir ljóðaunnandi og fyrrum bóksali, og Eva Björg Ægisdóttir rithöfundur. Formleg verðlaunaafhending mun fara fram á Júlíönu – hátíð sögu og bóka í Stykkishólmi í mars á næsta ári, þar sem verðlaunahafar koma fram og ljóðin verða lesin upp við hátíðlega athöfn. Umsjón með keppninni hafði Gréta Sigurðardóttir skipuleggjandi Júlíönu hátíðarinnar í samstarfi við verkefnastjóra menningarmála hjá SSV. Ljóðasamkeppnin var samstarfsverkefni Barnó – Best Mest Vest og Júlíönu – hátíðar sögu og bóka sem haldin er í Stykkishólmi til heiðurs skáldkonunni Júlíönu Jónsdóttur. Markmið barnamenningarhátíðarinnar er að efla menningarsamstarf í landshlutanum með áherslu á barnamenningu.

Litla ljóðið – eftir Brynhildi Eyju Jóhannesdóttur

Stundum sem ég ljóð

oftast fyrir fljóð.

Ljóð geta verið sorgleg,

löng, stutt og skemmtileg.

Þú lest þau bæði dag og nótt

og að lokum færðu ljóðasótt.

En þú finnur eitthvað í þeim,

ekki gamla skóreim.

Heldur eitthvað sem að kallar til mín

og ég held það kalli líka til þín.

Í ljóðum oftast boðskap er að finna

og ég reyni því oftast að sinna.

Það gæti orðið lítið, ljótt

eða kannski stórt og mjótt.

Gæti orðið um tröllvaxinn risa

eða kannski lítinn kisa.

En sama hvernig ljóðin eru,

þótt þau eru ekki um lifandi veru.

Þá kalla samt ljóðin til mín

og ég held þau kalli líka til þín.

Ung skáld á Vesturlandi láta til sín taka

Úrslit kynnt í ljóðasamkeppni Júlíönu og Barnó

Úrslit kynnt í ljóðasamkeppni Júlíönu og Barnó