Eins og sjá má í auglýsingu frá Nes fasteignasölu í síðasta Skessuhorni stendur til að á morgun, þriðjudaginn 25. nóvember klukkan 14:00, verði hægt að gera tilboð í kaup á íbúðum í Húsi kynslóðanna við Borgarbraut 63 í Borgarnesi. Á neðstu hæð hússins verða nemendagarðar fyrir Menntaskóla Borgarfjarðar en á efri þremur hæðum verða alls 12 íbúðir fyrir 55 ára og eldri boðnar til sölu. Húsið er enn í byggingu, verður fjögurra hæða lyftuhús með bílakjallara og sér geymsla í kjallara.

Fjórar íbúðir eru á hverri hæð og verða þær allar afhentar fullbúnar. Tvær stærðir eru af íbúðum, þ.e. 98,3 fm og 68,3 fm. Auk þessara fermetra eru svalir við hverja íbúð og möguleiki á að byggja yfir þær að hluta. Svalir við stærri íbúðirnar eru 30,6 fm. og hægt að byggja yfir helming þeirra. Svalir við minni íbúðirnar eru 24,4 fm. Söluverð íbúðanna er 98,5 milljónir fyrir þær stærri en 69,5 milljónir fyrir þær minni.