Umhverfis-, skipulags-, náttúruverndar-, og landbúnaðarnefnd Hvalfjarðarsveitar hefur lagt það til við sveitarstjórn Hvalfjarðarsveitar að vinnslutillaga um breytingu á aðalskipulagi Galtarlækjar fari að lokinni yfirferð í formlega auglýsingu og kynningu sem aðalskipulagsbreyting sveitarfélagsins.

Eins og fram hefur komið í fréttum Skessuhorns samþykkti sveitarstjórn Hvalfjarðarsveitar 25. september að auglýsa og kynna vinnslutillögu í Skipulagsgátt vegna Galtarlæks í Skipulagsgátt, meðal annars fyrir íbúum, landeigendum og hagsmunaaðilum. Jafnframt var haldinn kynningarfundur um málið í Stjórnsýsluhúsi Hvalfjarðarsveitar. Tillagan felur í sér að ráðist verður í gerð Galtarhafnar skammt vestan við Grundartangahöfn. Það er fyrirtækið Galtarhöfn ehf. sem hyggur á þessar hafnarframkvæmdir auk frekari uppbyggingar á atvinnustarfsemi á svæðinu.

Alls bárust 13 umsagnir á kynningartíma vinnslutillögunnar sem stóð frá 2.-23. október. Meðal annars bárust umsagnir frá Faxaflóahöfnum og Akraneskaupstað sem gerðu miklar athugasemdir við fyrirhugaðar hafnarframkæmdir og rekstur hafnar á þessum stað.

Umhverfis-, skipulags-, náttúruverndar-, og landbúnaðarnefnd Hvalfjarðarsveitar tók vinnslutillöguna til yfirferðar að loknum kynningartíma ásamt þeim umsögnum sem bárust og var málið tekið til afgreiðslu á fundi nefndarinnar á miðvikudaginn. Í bókun nefndarinnar segir að nú hafi verið lokið við gerð aðalskipulagstillögu og hafi áðurnefndar umsagnir; „eftir atvikum verið hafðar til hliðsjónar,“ eins og segir orðrétt í bókuninni. Samþykkti nefndin með þremur samhljóða atkvæðum að auglýsa tillöguna nú sem formlega tillögu að breytingu aðalskipulags. Einn nefndarmanna sat hjá við afgreiðslu nefndarinnar. Ákvörðun nefndarinnar kemur væntanlega til endanlegrar afgreiðslu sveitarstjórnar Hvalfjarðarsveitar í næstu viku.

Samþykkt að Galtarhöfn fari í aðalskipulagsauglýsingu