Í dag eru 60 ár liðin frá því skólahald hófst í þá nýbyggðu húsi á Leirá í Leirársveit. Að skólanum stóðu sveitarfélögin sunnan Skarðsheiðar sem síðar sameinuðust í Hvalfjarðarsveit. Haldið var upp á afmælið með veglegri dagskrá og veislu í Heiðarskóla síðastliðinn föstudag. Fjölmenni mætti, núverandi og fyrrverandi nemendur og starfsmenn og fleira fólk úr sveitinni.

Ef gripið er niður í sögu skólans kemur fram að fyrstu árin hét skólinn Leirárskóli en síðar var tekið upp nafnið Heiðarskóli. Sigurður R Guðmundsson var skólastjóri í upphafi. Fyrstu skólaárin var sá hluti nemenda sem átti lengst að fara á heimavist, en hluta nemenda var í daglegum skólaakstri. Heimavist var síðan lögð niður árið 1972, en hélt þó áfram um tíma fyrir nemendur frá fjarlægum byggðum. Á tíunda áratugnum var leikskóli og grunnskóli sameinaðir í eina stjórnsýslueiningu og um svipað leiti, eða árið 2011, var nýtt skólahús tekið í notkun. Leikskólinn Skýjaborg er rekinn í Melahverfinu og framundan er bygging nýs skólahúss fyrir hann í hverfinu. Þá standa yfir framkvæmdir við nýtt íþróttahús á Heiðarborg sem tekið verður í notkun fyrir upphaf skólaárs haustið 2026. Sigríður Lára Guðmundsdóttir er skólastjóri Heiðarskóla og Sigurður Þ. Sigurþórsson aðstoðarskólastjóri. Starfsfólk Heiðarskóla eru 28, á Skýjaborg eru 14 skráðir samkvæmt heimasíðu Heiðarskóla, en auk þess eru fimm skráðir, m.a. starfsfólk í mötuneyti. Alls eru því 47 starfsmenn Heiðarskóla sem gerir vinnustaðinn þann langstærsta á vegum Hvalfjarðarsveitar. Nemendur Heiðarskóla eru að jafnaði 80-90 talsins.

Hlýjar minningar

Fjölbreytt dagskrá var í boði á föstudaginn. Nemendur og starfsfólk sýndu gestum verkefni og leiðsögðu um skólann. Meðal annars var hægt að skoða verkefni sem tengjast átthagaþema en sögu skólans einnig gerð skil. Sérstök hátíðardagskrá hófst svo klukkan 11 þar sem Heiðnó-lagið var flutt, en börn í 7. bekk sömdu textann við lagið. Þá flutti Linda Björk Pálsdóttir sveitarstjóri ávarp. Sveitarstjórn Hvalfjarðarsveitar ákvað að færa skólanum í afmælisgjöf nýjan Pannavöll. Sex fyrrverandi nemendur skólans; þau Petrína Ottesen, Einar Sigurðsson, Einar Karl Birgisson, Sólveig Jónsdóttir, Logi Örn Ingvarsson og Ástdís Birta Björgvinsdóttir, sögðu frá minningum sínum frá skólaárunum. Þau eru á ólíkum aldri en afar fróðlegt var að hlusta á frásögn þeirra, því öll voru þau á einu máli um að hlýjar og jákvæðar minningar einkenndu skólaárin þeirra. Nemendaferðir, samheldni, frelsi, náttúran og gott mötuneytið var þeim ofarlega í huga. Í hádeginu var svo boðið upp á kjúklingasúpu og afmælisköku og dagskránni á föstudaginn lauk með því að Emmsjé Gauti skemmti viðstöddum.

**Hvalfjarðarsveit færði skólanum árnaðaróskir, blóm og nýjan Pannavöll. Sigríður Lára Guðmundsdóttir skólastjóri tók við gjöfinni frá Lindu Björk Pálsdóttur sveitarstjóra.**

**Gestir voru ánægðir með frumfrumflutning Heiðnó-lagsins.**

**Horft yfir salinn skömmu áður en hátíðardagskráin hófst.**

**Nemendur á yngsta stigi spreyttu sig á að teikna nýja og gamla Heiðarskóla.**

**Kjarnmikil og góð kjúklingasúpa var í boði fyrir alla.**

**Nemendur sýndu gestum afrakstur átthagafræðivinnu. Hér er Birgir Karlsson fyrrverandi skólastjóri að skoða verkefni um Síldarmannagötur.**

**Nemendur gáfu út veglegt afmælisrit um skólann sinn.**

**Vinsælt var að kíkja í myndaalbúm frá liðnum skólaárum.**

Þeir Sigurður Gunnarsson frá Lambhaga og Guðmundur Guðjónsson frá Arkarlæk voru meðal fyrstu nemenda skólans. Siggi á Neðra Skarði er hins vegar eldri en þeir en kom sem hreppsnefndarmaður mikið að starfi skólans og einnig að byggingu eldra skólahússins á sínum tíma.

Fjölmenni fagnaði sextíu ára afmæli Heiðarskóla – myndasyrpa