Í næstu viku verður Artak Beglaryan, fyrrverandi forsætisráðherra Nagorno-Karabakh, og píanóleikarinn Irina Hayrapetyan stödd hér á landi. Almenningi á Íslandi gefst þá tækifæri til að hlýða á klassíska tónlist og persónulegar frásagnir af lífi flóttamanna frá Nagorno-Karabakh. Komið verður saman í Hallgrímskirkju í Saurbæ miðvikudagur 12. nóvember kl. 19.30.

Í tilkynningu kemur fram að í september 2023 rak Aserbaídsjan 120.000 kristna armenska íbúa frá Nagorno-Karabakh til Armeníu og geta þeir ekki snúið aftur. Margir þessara Armena eru nú í afar erfiðri stöðu, án húsnæðis og atvinnu. Gefst nú tækifæri til að styðja neyðaraðstoð sem fer til matargjafa, vetraraðstoðar, lífsviðurværis og sálrænnar aðstoðar. Það eru dönsku hjálparsamtökin Mission10forty sem standa fyrir viðburðinum í Hallgrímskirkju. Forstöðumaður Mission10forty, Kim Hartzner læknir, verður einnig viðstaddur. Auk þess mun Birgir Þórarinsson fv. alþingismaður flytja stutt ávarp, en hann heimsótti Nagorno-Karabakh í stríðinu árið 2020. Síðan þá hefur Birgir unnið ötullega að því að styðja þá armensku íbúa frá Nagorno Karabakh sem nú hafa verið hraktir á flótta.

Artak Beglaryan fv. forsætisráðherra er blindur frá barnæsku vegna stríðsátaka í Nagorno-Karabakh. Hann hefur m.a. sagt frásögn sína á danska þinginu. „Við misstum ástvini, heimili, kirkjur og grafreiti forfeðra okkar – en við misstum ekki vonina. Stuðningur ykkar getur hjálpað fjölskyldum að endurbyggja líf sitt,“ segir Artak, sem mun segja frá eigin reynslu af stríðinu í Nagorno-Karabahk. Frásögn sem lætur engan ósnortinn.

Auk viðburðarins í Hallgrímskirkju nk. miðvikudag verður annar með sama sniði haldinn í Dómkirkjunni í Reykjavík fimmtudaginn 13. Nóvember kl. 19:30. Allir eru velkomnir og tekið á móti frjálsum framlögum.

Stuðningsviðburðir fyrir flóttamenn haldinn í Hallgrímskirkju