Loftgæði á Íslandi á síðasta ári voru almennt mjög góð. Undantekning var á fáeinum svæðum þar sem var vart við mengun frá eldgosum. Þetta kemur fram í ársskýrslu Umhverfis- og orkustofnunar um loftgæði á árinu 2024. Í skýrslunni kemur fram að aðeins einn mælistaður hafi farið yfir heilsuverndarmörk brennisteinsdíoxíðs þrátt fyrir eldgosatíðni. Það voru Hafnir á Reykjanesi en þar fór styrkurinn bæði yfir leyfilegan fjölda skipta klukkustundar- og sólarhringsmeðaltalsmarka. Auk þess fór ársmeðaltalsstyrkur brennisteinsvetnis yfir mörk í Hveragerði.

Það vekur athygli að þrátt fyrir talsverða umræðu um loftgæði vegna eldgosa að þá skuli aðeins tveir staðir fara yfir mörk á síðasta ári. Sérstaka athygli vekur, í ljósi umræðu um notkun nagladekkja, að gróft svifryk mælist aldrei yfir heilsuverndarmörkum á síðasta ári. Leyfilegt er samkvæmt heilsuverndarmörkum að svifryk megi fara 35 sinnum á ári yfir 50 míkrógrömm á rúmmeter á sólarhring. Það gerðist aldrei á þeim stöðum sem mæling fer fram. Oftast fór mengunin yfir 50 míkrógrömm á Strandgötu á Akureyri en aðeins átta sinnum. Næst kom Grensásvegur í Reykjavík sem aðeins fjórum sinnum fór yfir 50 míkrógrömm. Þrátt fyrir allt er sem betur fer langt í að svifryksmengun ógni settum heilsuverndarmörkum.

Hvað brennisteinsdíoxíð varðar miðast heilsuverndarmörkin við að það fari ekki oftar en 24 sinnum á ári yfir 350 míkrógrömm í rúmmetra á klukkustund. Eins og áður sagði var það einungis í Höfnum sem það fór yfir mörkin, eða 29 sinnum. Aðrir staðir eru þar langt að baki. Aðeins einu sinni fór það yfir 350 míkrógrömm á mælistað á Vesturlandi í Gröf í Hvalfirði.

Fínt svifryk var innan heilsuverndarmarka á öllum stöðum þar sem efnið var mælt á árinu 2024. Hæsta ársmeðaltal mældist við Kríuvörðu á Grundartanga eða 4,9 míkrógrömm á rúmmeter. Heilsuverndarmörkin eru 20 míkrógrömm á rúmmeter.

Sökum eldgosa var brennisteinsdíoxíð yfir sólarhrings- og klukkustundarmörkum í nokkur skipti árið 2024 en fór þó aðeins yfir leyfilegan fjölda skipta í Höfnum, eins og áður sagði. Heilsuverndarmörkin eru 350 míkrógrömm á rúmmeter. Hæsta ársmeðltalið mældist á Kríuvörðu á Grundartanga 7,3 míkrógrömm á rúmmetra.

Loftgæði almennt mjög góð á síðasta ári