Bæjarráð Grundarfjarðarbæjar ákvað á fundi sínum í gær að konur úr hópi bæjarstarfsmanna sem tóku þátt í kvennaverkfalli 2025 í Grundarfirði fái greidd laun allan daginn. Þetta er talsverð rýmkun frá því sem bæjarfélagið hafði upphaflega ákveðið.

Forsaga málsins er sú að eftir að tilkynnt var um fyrirhugað kvennaverkfall beindi Grundarfjarðarbær þeim tilmælum til forstöðumanna að greiða götu þeirra er taka vildu þátt í deginum svo hægt væri að fylgjast með dagskrá frá Arnarhóli og samtima dagskrá í heimabyggð án tekjumisss frá kl.13:00 þann dag og skipuleggja þyrfti starfsemi bæjarfélagsins í samræmi við það. Var þetta í takt við stefnu Sambands íslenskra sveitarfélaga í málinu.

Undirbúningshópur fyrir kvennafrí í Grundarfirði skipulagði hins vegar viðburð við Sögumiðstöðinu kl. 10 að morgni kvennaverkfallsdagsins. Daginn fyrir verkfallsdaginn sendi hópurinn tölvupóst til bæjarstjóra Grundarfjarðarbæjar þar sem því er lýst yfir að því verði ekki trúað að bæjarfélagið hyggist skerða laun þeirra er þátt taka í verkfallinu allan daginn. Síðar sama daginn komu svipaðar óskir frá Kili, stéttarfélagi starfsmanna í almannaþjónustu og Verkalýðsfélagi Snæfellinga.

Eins og áður sagði var málið tekið fyrir í bæjarráði Grundarfjarðar í gær. Þar bókaði ráðið m.a. að sveitarfélagið beri; „ábyrgð gagnvart öllum sínum hagaðilum, m.a. vegna lögbundinnar almannaþjónustu. Engum var meinuð þátttaka í heilsdags dagskrá í heimabyggð, en óskir um launaða fjarveru allan daginn voru seint fram komnar og gáfu ekki svigrúm til afgreiðslu af hálfu bæjarstjórnar,“ segir orðrétt í bókun ráðsins.

Þá segir einnig: „Bæjarráð fagnar frumkvæði og drifkrafti grundfirskra kvenna, sem skipulögðu dagskrá dagsins. Bæjarráði þykir miður að ósk um launað frí, allan daginn, hafi borist seint þannig að ekki gafst svigrúm til afgreiðslu þess. Bæjarráð samþykkir að konur úr hópi bæjarstarfsmanna, sem tóku þátt í kvennaverkfalli 2025 í Grundarfirði, fái greidd laun allan daginn.“

Grundarfjarðarbær rýmkaði greiðslur vegna kvennaverkfalls