-spjallað við nýja eigendur Steðja ehf. á Akranesi

Það er gamall og góður frasi að þegar einar dyr lokast opnast aðrar. Mörgum þótti að vonum margar dyr lokast þegar tæknifyrirtækið Skaginn3X ehf. var lýst gjaldþrota í júlí 2024. Fjölmargir starfsmenn fyrirtækisins misstu atvinnuna og þurftu að endurskipuleggja sín mál. Ekki síst átti það við um mikinn fjölda iðnaðarmanna er starfað höfðu hjá fyrirtækinu og fyrirrennurum þess, sumir hverjir um áratuga skeið. Tveir þeirra, Skagamennirnir Sigurbjörn Lárusson og Björn Valdimarsson, ákváðu að róa á önnur mið. Sigurbjörn hafði frá árinu 1998 starfað hjá Þorgeir & Ellert og síðar Skaganum 3X. Björn hafði nýverið komið til starfa hjá Skaganum 3X. Hann var þó ekki ókunnur fyrirtækinu því hann starfaði áður hjá Þorgeir & Ellert. Báðir höfðu þeir félagar á sínum tíma lokið sveinsprófi; Björn í vélvirkjun og Sigurbjörn í rafsuðu.

Þegar hér var komið sögu hafði lengi blundað í Sigurbirni að hefja eigin rekstur. Í einu slíku samtali við samstarfsmann hafði viðmælandinn orð á því af hverju hann festi bara ekki kaup á Steðja sem þá hafði skömmu áður verið auglýstur til sölu. Í þessu samtali var sáð fræi sem fór að spíra nokkrum mánuðum síðar við gjaldþrot Skagans 3X. Þá stóðu þeir félagar Sigurbjörn og Björn skyndilega uppi án atvinnu, nokkuð sem hvorugur þeirra hafði átt að venjast eftir langan starfsferil á sama staðnum. Þá fóru þeir loks að ræða af fullri alvöru hvort nú væri ekki kominn rétti tímapunkturinn til þess að láta drauminn rætast um eigin rekstur.

Vélsmiðjan Steðji ehf. var stofnuð árið 1997 af þeim frændum Jóni Þórólfi og Guðjóni Heiðari Guðmundssonum. Rekstur vélsmiðjunnar hófst á Vesturgötu en um aldamótin var hún flutt í núverandi húsnæði á Ægisbraut. Þeir bræður ákváðu árið 2024 að auglýsa fyrirtækið til sölu eftir rekstur í 28 ár. Þeir félagar Sigurbjörn og Björn hófu viðræður við þá frændur og í september 2024 var kaupsamningur undirritaður. Þeir tóku síðan alfarið við rekstrinum um síðustu áramót.

**Skóhillur sem starfsmenn Steðja smíðuðu fyrir Grundaskóla á Akranesi**

Tækifæri til vaxtar

Því er ekki úr vegi að fræðast um rekstur Steðja undir stjórn nýrra eigenda.

Þeir félagar segja að það hafi verið gott tækifæri að taka við rótgrónu fyrirtæki sem rekið hefur verið við góðan orðstír. „Þarna var einfaldlega komið tækifæri til að taka við fyrirtæki í fullri starfsemi, vel reknu og virtu,“ segja þeir félagar og bæta við að næg verkefni hafi verið hjá fyrirtækinu um árabil og því tækifæri til vaxtar.

Í dag starfa sjö manns hjá Steðja í fullu starfi en voru áður fimm. Jón, annar stofnandanna, starfar hjá fyrirtækinu en Guðjón lét af störfum þegar Sigurbjörn og Björn höfðu tekið að fullu við stjórn fyrirtækisins. Aðspurðir segja þeir Sigurbjörn og Björn að engar stórvægilegar breytingar hafi verið gerðar á rekstri fyrirtækisins frá því að þeir keyptu reksturinn. „Við sinnum áfram sömu verkefnum og áður en með auknum starfsmannafjölda hafa opnast tækifæri til að sinna enn breiðari hópi viðskiptavina og hefur þekking og reynsla okkar komið þar að góðum notum,“ segir þeir félagar.

Fyrirtækið sinnir hvers kyns smíði og þjónustu við einstaklinga og fyrirtæki bæði á Akranesi og í nærsveitum. Má þar t.d. nefna smíði stálbita fyrir sumarhús, handriða inni og úti, skóhillur, hönnun og smíði á smáum færiböndum svo fátt eitt sé nefnt. Þá sinna starfsmenn fyrirtækisins ýmis konar viðgerðum og lagfæringum á stórum og smáum hlutum, allt frá sláttuorfum til stórra vinnuvéla. „Starfsmenn fyrirtækisins hafa marga fjöruna sopið og eru því í raun færir í flestan sjó og því fátt okkur óviðkomandi ef því er að skipta,“ segja þeir.

Fátt hefur því komið þeim félögum á óvart á fyrstu mánuðum þeirra í rekstri Steðja en einna helst sú staðreynd hversu víða tækifærin liggja og því er helsta áskorunin að velja þau bestu hverju sinni. „Fyrstu mánuðirnir í okkar rekstri hafa kennt okkur að tækifærin liggja víða, við erum vel í sveit settir og markaðssvæðið því afar stórt ef við viljum svo við hafa. Okkur standa margar dyr opnar. Það er því engin ástæða til annars en vera bjartsýnir með okkar rekstur,“ segja Björn og Sigurbjörn að lokum.

Tækfærin liggja víða

-spjallað við nýja eigendur Steðja ehf. á Akranesi

-spjallað við nýja eigendur Steðja ehf. á Akranesi