Á morgun fer fram síðasta umferð í neðri hluta Bestu-deildarinnar í knattspyrnu. Augu flestra knattspyrnuáhugamanna beinast að tveimur leikjanna. Annars vegar leik ÍA og Aftureldingar sem fram fer á Elkemvellinum á Akranesi og hins vegar leik Vestra og KR sem fram fer á Kerecisvellinum á Ísafirði. Flautað verður til beggja leikjanna kl. 14.

Báðir geta þessir leikir ráðið úrslitum um það hvaða tvö lið falla úr deild þeirra bestu. Staðan er flókin og upp geta komið margar þessara viðfrægu sviðsmynda. Lið Aftureldingar er sem stendur neðst í deildinni með 27 stig og í hinu fallsæti deldarinnar sitja liðsmenn KR með 28 stig. Lið KR gæti á morgun fallið úr deild þeirra bestu í fyrsta skipti síðan árið 1977. Þriðja liðið sem gæti fallið á morgun er lið Vestra sem er með 29 stig.

Þá skulum við líta til hinna frægu sviðsmynda. Einfaldasta sviðsmyndin er sú að Vestri vinni KR. Þá falla lið KR og Aftureldingar óháð því hvernig leikurinn á Akranesi fer. Blaðamanni líkar best við einfaldar lausnir. En stundum er lífið ekki svo einfalt. Vinni KR Vestra falla Vestri og Afturelding. Einföld lausn líka, en súrari. Þá er komið að flóknari sviðmyndunum. Ljúki leik ÍA og Aftureldingar með jafntefli og leik Vestra og KR líka þá falla Afturelding og KR. Vinni Afturelding ÍA og leik Vestra og KR líkur með jafntefli falla Vestri og KR úr deildinni.

Leikur ÍA og Aftureldingar getur því spilað stórt hlutverk í framtíð einstakra liða í Bestu deildinni. Því leitar hugurinn auðvitað til síðustu spyrnu Vestra í leiknum við Aftureldingu á sunnudaginn. Sú spyrna endaði í marki Aftureldingar og svo skrítið sem það nú er, spyrnan og markið tryggðu sæti ÍA í deild þeirra bestu þrátt fyrir að hafa nokkrum andartökum áður tapað stórt gegn KA norður á Akureyri.

En auðvitað eru svona hugrenningar óþarfar. Skagamenn hafa alltaf sótt sína bestu sigra á heimavelli þegar mest ríður á.

Launa Skagamenn fyrir markið?